Бугун, 8 февраль куни Алишер Навоий номидаги Тошкент давлат ўзбек тили ва адабиёти университетида «Алишер Навоий ва XXI аср» мавзусида республика илмий-амалий анжумани бўлиб ўтмоқда. Бу ҳақда «Дарё» мухбири хабар бермоқда.
Университетда ташкил этилган мазкур анжуманда 15 дан ортиқ хорижий мамлакатларнинг Ўзбекистондаги фавқулодда ва мухтор элчилари, хусусан, АҚШнинг Ўзбекистондаги фавқулодда ва мухтор элчиси Памела Леора Спратлен, Франция элчиси Вилон де Вилмор, Бангладеш элчиси Мосуд Маннан, Эрон элчиси Баҳман Огорази Дурманилар иштирок этди.
Бундан ташқари, анжуманда миллий-маданий марказлар раҳбарлари, тилшунос ва адабиётшунос олимлар, кенг жамоатчилик вакиллари ҳам қатнашди. Анжуман Алишер Навоий ҳайкали пойига гул қўйиш маросими билан бошланди.
Университет ректори, филология фанлари доктори, профессор Шуҳрат Сирожиддинов йиғилганларни буюк аллома таваллудининг 577 йиллиги билан қутлади. Олий ва ўрта махсус таълим вазири Иномжон Мажидов, Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси раиси ўринбосари Камолиддин Эшонхўжаев, ЮНЕСКОнинг Ўзбекистондаги ваколатхонаси раҳбари Дендев Бадарч, Ўзбекистон Ёзувчилар уюшмаси раиси Муҳаммад Али сўзга чиқиб, Навоий ижодини ўрганишга бўлган қизиқиш янада ошиб бораётганини, унинг асарлари оламшумул аҳамиятга эгалигини ва бутун дунё Навоий шахсига ҳурмат бажо этишининг боиси у илгари сурган ғоялар ҳеч қачон эскирмаслигида эканлигини эътироф этди.
Анжуманда санъаткорлар томонидан мумтоз мусиқа ва қўшиқлар ҳам ижро этилди.
Анжуман 6 та шўъбада ўз ишини давом эттирмоқда.
Изоҳ (0)