2017 йил 1 январдан бугунги кунга қадар Президентнинг виртуал қабулхонасига Оҳангарон тумани фуқароларидан 5991 мурожаат, Оҳангарон шаҳри аҳолисидан эса 144 мурожаат келиб тушган. Мурожаатларнинг 26 фоизи Оҳангарон тумани ҳокимлиги ваколати доирасида бўлиб, ҳокимлик мутасаддилари томонидан уларнинг 1554 таси кўриб чиқилган, 3 та ҳолат бўйича ўрганишлар давом этмоқда.
Мурожаатларнинг 38,9 фоизи Оҳангарон шаҳар ҳокимлиги ваколати билан боғлиқ бўлиб, уларнинг 98 таси кўриб чиқилган. Қолган 46 ҳолат бўйича ўрганишлар давом этмоқда.
Мурожаатлар асосан суд-ҳуқуқ, солиқ соҳасига оид муаммолар, ер-кадастр, банкдан кредит олиш, ишга кириш, турар жой, коммунал хизмат, соғлиқни сақлаш, болалар нафақаси, алиментни ундириш каби масалалардир. Йўл қурилиши, пенсия ва нафақа таъминотига алоқадор кўплаб мурожаатлар ҳам Оҳангарон шаҳар ва туман аҳолисини ўйлантираётгани маълум бўлди. Аниқланган камчилик ва қилинган мурожаатларнинг аксарияти жойида ҳал этилди.
Оҳангарон шаҳри Орзу маҳалласидаги кўп қаватли уйда яшовчи Гулмира Охунова ҳудудда болалар майдончаси, автомашиналар учун махсус турар жой қуриш бўйича оммавий қабулга қилган мурожаати ижобий ечим топадиган бўлди.
Тумандаги «Нўғой қўрғон» маҳалла фуқаролар йиғинида яшовчи Сарвиноз Абдусамадова кичик фарзанди II гуруҳ ногирони бўлгани учун унга қараб, анчадан буён ишга жойлашолмаётган эди. Оммавий қабулда соҳа ходимлари томонидан унинг оилавий широити ўрганилиб, туманда янги ташкил қилинаётган текстил заводига ишга қабул қилинадиган бўлди.
Шунингдек, «Соғлом авлод учун» халқаро хайрия фонди Тошкент вилояти ҳудудий филиали томонидан аҳоли тиббий кўрикдан ўтказилди. Ижтимоий ҳимояга муҳтож, имконияти чекланган фуқароларни моддий ва ижтимоий қўллаб-қувватлаш мақсадида ташкилотчилар томонидан 8 турдаги дори-дармон бепул тарқатилди.
Оммавий қабуллар Бекобод ва Олмалиқ шаҳарларида ҳам ўтказилди.
Изоҳ (0)