Унда икки давлат тадбиркорлари ўртасидаги ўзаро ҳамкорликни мустаҳкамлаш бўйича муҳим масалалар муҳокама қилинди. Жанубий кореялик ишбилармонларда вилоят тадбиркорлари ва ҳунармандлари томонидан ташкил этилган кўргазма катта таассурот қолдирди.
— Форум мамлакат, хусусан, Хоразм вилоятининг экспорт, инвестиция ва туристик салоҳиятини янада ошириш, икки давлат ишбилармонлари хамкорлигини ривожлантиришга хизмат қилади, — деди Ўзбекистон Савдо-саноат палатаси раиси ўринбосари Ж. Ўроқов. — Шунингдек, қўшма лойиҳаларни амалга ошириш мақсадида чет эл инвестицияларини жалб қилишга қўшимча рағбат ҳам дейиш мумкин. Бугунги кунда Жанубий Кореянинг қурилиш, косметика, савдо, заргарлик саноати соҳаларидаги 30 дан ортиқ йирик компанияси вакиллари Ўзбекистондаги инвестиция муҳитига қизиқиш билдирмоқда.
Форум доирасида иштирокчилар ўзларини қизиқтирган кўплаб саволларни ўртага ташлади ва муҳокама қилди. Кореялик тадбиркорлар мамлакатда яратилган қулай инвестиция муҳити билан яқиндан танишди.
— Кореялик ишбилармон доира вакиллари Ўзбекистонга катта қизиқиш билан қарайди, — дейди Жанубий Корея делегацияси раҳбари Ким Ён Гу. —Ўзбекистон Жанубий Кореянинг Марказий Осиё минтақасидаги асосий савдо ҳамкори ҳисобланади. Жумладан, Жанубий Кореянинг минтақа давлатлари билан маҳсулот айланмаси ҳажмининг ярмидан кўпи Ўзбекистон ҳиссасига тўғри келиши ҳам фикримни тасдиқлайди.
Бизнес форум доирасидаги тадбирлар мулоқотларга бой бўлди. Жанубий Кореянинг етакчи компаниялари ва ўз фаолиятини ташкил этиш истагини билдирган вилоятдаги йирик корхоналарнинг 150 дан ортиқ вакиллари ўртасида ўзаро ҳамкорлик алоқалари яқин кунларда янада мустаҳкамланади.
Изоҳ (0)