Шотландияда супермаркетдаги робот ўз вазифаларини бажара олмагани учун «ишдан бўшатилди»

Шотландиянинг Margiotta супермаркетлар тармоғида Pepper моделидаги Фабио исмли робот бир ҳафта давомида мижозларга хизмат кўрсатиш мақсадида фойдаланилди. Бироқ робот бир ҳафтадан сўнг малакасизлиги ва мижозларнинг хавфсираши сабабли ишдан бўшатилди, деб ёзмоқда TJournal.

Pepper моделидаги роботлар турли соҳаларда қўлланилади. Фабио супермаркетда харидорларга маълумот бериши, маҳсулотларни реклама қилиши ва уларни қаердан топиш мумкинлигини айтиши керак бўлган. Супермаркет тармоғи эгалари таъкидлашича, «биринчи эмоционал робот» ҳисобланган Pepper биринчи кунларда ҳаммани ҳазилларга ва қучоқлаш таклифларига кўмиб ташлаган.

Бироқ у асосий вазифаларни уддалай олмаган. Робот кўплаб саволларга умумий ва фойдасиз жавобларни берган. Супермаркетдаги шовқин сабабли у сўзларни фарқлай олмаган ва мижозлар саволни бир неча марта такрорлашга мажбур бўлган.

У гўшт савдосида ҳам одамлардан кўра анча секинроқ ишлаган. Охир-оқибат роботни ишдан бўшатишга қарор қилинган.