Ўзбекистонга расмий ташриф билан келган Грузия парламенти раиси Ираклий Кобахидзе бошчилигидаги делегация Инвестициялар бўйича давлат қўмитаси вакиллари билан учрашди. Бу ҳақда UZ24 хабар бермоқда.
Томонлар музокараларда Ўзбекистон ва Грузия ўртасида савдо-иқтисодий, инвестициялар, туризм, транспорт-логистика соҳалари, шунингдек, транзит йўлакларни шакллантириш масалаларини муҳокама қилди.
Делегация 21 январь куни Самарқанд шаҳрида бўлди. Дастлаб Ҳазрати Хизр мажмуасига ташриф буюриб, Ўзбекистон Республикасининг Биринчи Президенти Ислом Каримов қабрига гул қўйди ва унинг хотирасига ҳурмат бажо келтирди. Меҳмонлар Ислом Каримов мустақил Ўзбекистон Республикаси тараққиёти йўлида улкан ишларни амалга оширган тарихий шахс эканини таъкидлади.
Делегация аъзолари Шоҳи Зинда ёдгорлик мажмуи, Хўжа Дониёр зиёратгоҳи, Мирзо Улуғбек расадхонаси, Регистон майдони ва бошқа тарихий-маданий масканларида ҳам бўлди.
22 январь куни Олий Мажлис Сенатида Сенат раиси Ниғматилла Йўлдошевнинг Грузия парламенти делегацияси билан учрашуви бўлиб ўтди. Учрашув ва музокалар чоғида томонлар парламентлараро алоқаларни янада ривожлантиришнинг ҳолати, савдо-иқтисодий, инвестициявий, транспорт-коммуникация, маданий-гуманитар ва ўзаро манфаатли бошқа соҳалардаги икки томонлама ҳамкорлик истиқболларини муҳокама қилди.
Грузия парламенти раиси Ираклий Кобахидзе бошчилигидаги делегация Олий Мажлис Қонунчилик палатасига ҳам ташриф буюрди. Олий Мажлис Қонунчилик палатаси спикери Нурдинжон Исмоилов грузиялик ҳамкасбини қутлаб, мамлакатда Ҳаракатлар стратегиясига мувофиқ олиб борилаётган кенг кўламли ислоҳотлар хусусида маълумот берди.
Икки мамлакат ўртасидаги ҳамкорликнинг истиқболлари муҳокама этилди. Савдо-иқтисодий соҳадаги, экспорт ва импорт ҳажмини ошириш каби лойиҳаларни ҳаётга тадбиқ этиш долзарблиги таъкидланди.
Грузия парламенти ташрифи якунларига кўра, Олий Мажлис ва Грузия парламенти ўртасида парламентлараро ҳамкорлик тўғрисидаги меморандум имзоланиши режалаштирилмоқда.
Ираклий Кобахидзе Ўзбекистондаги грузин диапораси вакиллари билан ҳам учрашди.
Грузия парламенти делегацияси аъзолари Мустақиллик майдонига ташриф буюриб, «Мустақиллик ва эзгулик» монументи пойига гулчамбар қўйди.
Изоҳ (0)