Фото: Тошкентга ошиқаётган Benoy — у нималар қурган?

Benoy — жаҳондаги энг йирик халқаро архитектура ва дизайнерлик бюроларидан бири бўлиб, унга 1947 йили Гордон Benoy ва унинг ҳамкорлари томонидан асос солинган. ArchiKultura’нинг ёзишича, фаолиятининг дастлабки даврида компания асосан қишлоқ хўжалиги бинолари ва иншоотларини лойиҳалаштирган.

Баҳрайн пойтахти Манамадаги Bahrain Marina

Макаодаги City of Dreams мажмуаси

Вьетнам пойтахти Ханойдаги Han Jardin

Компаниянинг бош қароргоҳи Британиянинг Ньюарк шаҳрида жойлашган. Вақт ўтиши билан имкониятлар кенгайиб, 1995 йили Лондонда компаниянинг янги бўлинмаси ташкил этилган. Benoy бюроси 2008 ва 2013 йилларда қиролича Елизавета II нинг қўлидан нуфузли совринларни қабул қилиб олган.

Британиянинг Манчестер шаҳридаги MediaCityUK

Нью-Деҳлидаги The Amaryllis

Украина пойтахти Киевдаги Марказий универмаг биноси

Швеция пойтахти Стокгольмдаги Mall of Scandinavia мажмуаси

Benoy’нинг лойиҳалари креативлиги, оригиналлиги ва юқори сифат даражасида бажарилиши билан обрў-эътибор қозонган. Компания архитектура концепцияларини тайёрлаш, интерьер ва график дизайнни режалаштиришга ихтисослашган бўлиб, кўп функсионал улкан лойиҳаларни ишлаб чиқиш бўйича катта тажрибага эга.

Канаданинг Монреал шаҳридаги Royalmount

Вьетнам пойтахти Ханойдаги Yen So Park

Хитойнинг Сучжоу шаҳридаги Suzhou Center

Шанхайдаги DreamCenter

Бюронинг ваколатхоналари, Лондондан ташқари, Абу-Даби, Гонгконг, Шанхай, Сингапур, Мумбай, Пекин, Мельбурн ва бошқа шаҳарларда жойлашган. Benoy амалга оширган лойиҳалар географияси жаҳоннинг 80 га яқин мамлакатини қамраб олади.

Компания ўз меҳнат жамоаси — Буюк Британия, Яқин Шарқ, Ҳиндистон, Хитой ва Осиёнинг бошқа мамлакатларидаги дизайн-студияларда ишлаётган иқтидорли архитекторлари билан фахрланади. Айнан мана шундай жамоа, унинг истеъдоди ва тажрибаси шарофати билан Benoy жаҳон даражасидаги архитектура бюросига, етакчи ижодий кучга айланган.

Хитойнинг Нинбо шаҳридаги Ningbo New World

Абу-Дабидаги Ferrari World

Миср пойтахти Қоҳирадаги KM45

Ҳиндистондаги Supernova осмонўпар биноси

Компания вакилларининг фикрича, «лойиҳа устидаги иш ижод, ҳамкорлик ва мулоқотга асосланмоғи лозим». Шу боис ҳам компания портфолиосидан амалга ошириб бўлинган 400 дан зиёд лойиҳа ўрин олган, улар орасида — «Alibaba.com»нинг бош қароргоҳи, Киевдаги янгиланган Марказий универмаг, ултазамонавий Mall of Scandinavia савдо-кўнгилочар мажмуаси (СКМ), Сингапурдаги Jewel Changi аэропорти, Европадаги энг йирик СКМ — Bluewater, Ҳиндистондаги Supernova осмонўпар биноси ва бошқалар бор.

Озарбайжон пойтахти Бокудаги Caspian Waterfront

Чехиянинг Оломоуц шаҳридаги Galerie Santovka

Сингапурдаги Jewel Changi аэропорти

Лондондаги Battersea Water Station

Компания фалсафаси шундай — жаҳоннинг барча нуқталаридан маданият ва тажрибани тўплаб, кўплаб мамлакатлардаги мижозлар ва профессионал ҳамкасблар билан алоқалар ўрнатиш.

«Биз ўз билим ва тажрибаларимизни экспорт қилиб, тадқиқот дастури ёрдамида янги ғояларни импорт қиламиз. Энг асосийси, мижозларимиз мана шундай маҳаллий тасаввур ва ‘глобал назар’ қоришмасидан фойда кўради... Истиқомат қилаётган шаҳримиз муҳитини яхшилаш билан биз ўзимиз-да фахрланишимиз мумкин бўлган мерос қолдиришимиз мумкин», — дейди компания вакиллари.

ArchiKultura’нинг ёзишича, Benoy Ўзбекистонда ҳам ўзига хос архитектура лойиҳасини амалга ошириш арафасида турибди.