Ўзбекистон футболига жавобгар шахс бўлганига 100 кун тўлиши муносабати билан билан Умид Аҳмаджонов «Газета.uz» нашрига интервью берди. Бунда у бир қатор муаммоларга тил текказиб ўтган.
Жумладан, Аҳмаджонов миллий чемпионатнинг эски формати талабга жавоб бермаслиги ҳақида айтиб, футболчиларда дам олиш кунлари керагидан кўп бўлганини танқид остига олган.
16 та жамоа иштирок этадиган чемпионатда бир нечта жамоагина, асосан, «Пахтакор», «Локомотив» ва «Бунёдкор» чемпионлик учун кураш олиб борган. Қолганлар эса 10 таликка кириб олса, ўзини бўшиб қўйиб юраверган. Агар жамоалар кучаймаса, миллий терма жамоа бугунгидек кучсиз бўлиб қолаверади. Энди эса рақобат пайдо бўлиши керак.Супер Лиганинг янги форматида 12 та жамоа чемпионлик учун кураш олиб боради. Улар мавсум давомида 32 та турда иштирок этади. Турлар ва босқичлар кўриниши ўзгаради.Шу вақтгача мавсумлар оралиғидаги танаффус 3 ойлик бўшлиққа сабаб бўлди. Клублар футболчиларга 10—20 кунлаб таътил бераверган. Қандай спорт турида бўлмасин, машғулотлардан чекинган спортчи уч қадам орқага кетаверади. Оқибатда кўплаб футболчилар ортиқча вазн муаммосига дуч келди. Айримлари ҳатто чилим чекиб юради. Келаси мавсумдан бошлаб бу каби ҳолатларга барҳам беришимиз керак.
Умид Аҳмаджонов, ЎФФ президенти
Янги форматни таклифлар асосида қабул қилдик. Турлар ва босқичлар анча ўзгарди. Унга кўра, клублар 32 тур учрашувида иштирок этади. Бунгача турлар орасидаги фарқ 6—7 кунни ташкил қилган бўлса, энди бўшлиқлар қисқаради. Нега футболчилар бу каби кўп дам олиши керак?Ташкилот президенти нормативлар нега жорий қилингани масаласини ҳам тушунтиришга ҳаракат қилган. Футболчиларда аниқ тартибнинг йўқлиги сабаб, улар ўз устида ишлашдан тўхтаб қолган. Оқибатда, жисмоний томондан оқсоқланиб юраверган.Ҳозиргача келишилган ўйинлар масаласи ҳам кун тартибида бўлганди. Янги формат бу каби иллатлар бўлмаслиги йўлида навбатдаги қадамлардан бири бўлади.
Про-Лигада эса 24 ёшгача бўлган футболчилар тўп суради деган гаплар йўқ. Ёшни чегараламаймиз. Шунчаки, ёш футболчилар кўпроқ ўйин амалиётига эга бўлишини истамоқдамиз. Чунки футболимизда қисман зўравонлик бор. Айрим клубларда ёши катта 2—3 футболчи ўзидан ёшроқларга кун бермайди. Вилоятдан келган ёшлар уларнинг овқатини ҳам столига олиб келиб бериши лозим. Бу ҳақда менга бир қатор ёш футболчиларнинг ўзи айтиб берди.
Умид Аҳмаджонов, ЎФФ президенти
Нормативларни нега жорий қилдик? Тўғри, баъзи футболчилар бироз секин ҳаракат қилиши, аммо ажойиб паслар узатиши мумкин. У майдонни яхши кўриши, кучли дриблингга эга бўлиши ҳам катта эҳтимол. Бироқ қайси спорт турида бўлишидан қатъий назар, спортчида тезлик ва тиришувчанлик ҳам бўлиши шарт.Бизнинг футболчилар 17:00 да машғулотга келади. Нари борса 1—1,5 соат шуғуллангач, бири чойхонага, бошқаси туғилган кунини нишонлаш учун ресторанга йўл олади. Уйга ярим тун қилиб келади ва 3—4 ларда уйқуга кетади. Кейин тушки 12 да уйғонади. Нормал кун тартибининг ўзи йўқ.
Биз футболчиларнинг жисмоний тайёргарлиги масаласини ўрганиб чиқдик, улар бор-йўғи 52 дақиқа юқори савияда футбол кўрсата олади. Ваҳоланки, яхши футболчи 120 дақиқа бир текис ўйнай олиши керак. Шундай экан, клублардаги машғулотлар масаласини ҳам регламентга киритамиз, жисмоний зўриқишларни икки карра оширамиз. Чунки кўрдик, футболчилар тестдан жуда ёмон ўтмоқда. Ҳатто айрим ҳакамларнинг натижаси футболчиларимизникидан юқори эканига нима дейсиз?
Умид Аҳмаджонов, ЎФФ президенти
Супер Лига футболчилари ЎФФ жорий қилган нормативдан ўта олмаяпти. Кўрсаткичлар жуда паст
Суҳбатда баён қилинишича, Тошкент клублари кучайиб боргани билан, айрим вилоятларда футбол тамом бўлаверган. Бу эса бориб-бориб, футболчилар ўртасидаги рақобатга ҳам ўз таъсирини кўрсатган.Қорақалпоғистон, Сурхондарё ва Жиззахда футбол ўлик ҳолатда. Бу ҳеч кимни ташвишга солаётгани йўқ. Вилоят ҳокимлари бир вақтнинг ўзида вилоят футбол федерациясига ҳам раҳбарлик қилади. Шундай экан, ҳар бир вилоятда бизнинг талабларга жавоб бера оладиган клублар вужудга келишини таъминлашимиз керак. Нега энди Қорақалпоғистон жамоаси Супер Лига учун ҳаракат қилмаслиги керак? Нега энди фақат марказга эътибор бериб, чекка вилоятларни унутишимиз керак?Агар баъзи мураббийлар фаолиятини ўрганиб чиқсангиз, улар асосан ўзи билган 15 футболчи билан мавсумни ўтказади. 22—23 ёшдаги навқирон йигитлар эса захирада ўтираверади. Клубларнинг ўртача ёши 30—32 ни ташкил қилмоқда. Ахир Европада ёш футболчилар 16—17 ёшидаёқ катта клублар сафида порламоқда. Бизда эса 22 ёшида ҳам захирадан чиқа олмайди. Қайтараман, клублар олдинга қадам ташламагунига қадар, миллий терма жамоани кучайтириб бўлмайди.
Умид Аҳмаджонов, ЎФФ президенти
Изоҳ (0)