Путин 1970 йилларда каскадёр сифатида фильмларда суратга тушган

Россия президенти Владимир Путин 1970 йилларда «Ленфильм» киностудиясининг бир неча картиналарида каскадёр сифатида суратга тушган. Бу ҳақда, Путиннинг тасвирга олиш майдончасидаги шерикларига асосланиб, «Дождь» телеканали хабар берди.

Бўлажак президент кинода дўсти Аркадий Ротенберг билан бирга суратга тушган. Улар мураббий Анатолий Рахлиннинг самбо (кейинчалик дзюдо) тўгарагида танишиб қолган. Ҳар иккиси спорт устасига айланиб, бирга мусобақаларда қатнашган.

Курашчи Александр Массарский 1950 йилларда «Ленфильм»да трюкли съёмкалар бўйича маслаҳатчи бўлиб ишлаган — у Анатолий Рахлиннинг мураббийи бўлган, Рахлин эса Путиннинг устози. «Ленфильм»да тўлақонли каскадёрлар жамоаси бўлмагани сабаб, тасвирга олиш ишларига спортчилар жалб этилган. Хусусан, Рахлин ўзининг «Президент сэнсэйи» номли автобиографик китобида 100 дан зиёд фильмларда суратга тушганини ёзган.

Ротенберг «Ижора батальони» номли фильмда иккинчи даражали ролни ижро этган. Тасвирга олиш ишларида қатнашган Пётр Тархановнинг сўзларига кўра, у мудофаада қатнашаётган «оддий ижор ишчиси»ни ўйнаган. Ўша фильмда Путиннинг бошқа бир таниши — Россия парламентининг собиқ депутати, Халқаро самбо федерацияси президенти Василий Шестаков ҳам суратга тушган.

Шестаковнинг «Дождь»га маълум қилишича, Путин «Ижора батальони» фильмида каскадёр сифатида қатнашган. «Биз ‘Блокада’ ва ‘Ижора батальони’ фильмларида бирга суратга тушганмиз», — деди у. Шестаковнинг сўзларига кўра, улар бирга суратга тушган учинчи фильм ҳам бор, бироқ унинг номини эслай олмаган.

«Биз учун ролнинг кимлиги аҳамиятсиз эди. Бу ишимизга ўша вақтлар учун яхши пул тўлашарди. Биз талаба эдик, иш ҳақимизга, масалан, ‘Кавказ’ ресторанига боришимиз мумкин эди. Менинг муҳандислик маошим 110 рубль бўлса, съёмканинг ҳар бир куни учун 75 рублдан ҳақ олардим. Яъни, бу жуда яхши пул эди», — дея тушунтирди у.

Бошқа бир собиқ жангчи Николай Вашчилин ҳам Путиннинг «Ленфильм» киноларида каскадёр сифатида суратга тушганини тасдиқлади. Вашчилин ҳам Рахлиннинг шогирдларидан бири. Кейинчалик у «Ленфильм»да трюклар постановкачиси сифатида ишлаган.

«Бизни ‘Блокада’дек катта фильм съёмкасига чақиришган. Вилоят партия қўмитаси раисининг ‘10 минг кишилик оммавий саҳнани таъминлаш’ ҳақидаги буйруғи бор эди. Шунинг учун барча талабалар, ҳарбий билим юртлари, спорт жамиятларидан одамлар йиғиб келинган. Шунчаки оммавий саҳнада қатнашсанг 3 рублдан тўлашарди, бизга эса кунига 10 рубль беришарди. Шунинг учун бу иш бизга жуда ёқарди», — деди Вашчилин.