Мусулмонлар идораси Муҳаммад пайғамбар (с.а.в) таваллуд топган ой бошланганини маълум қилди

Ўзбекистон мусулмонлари идораси Фарғона вилояти вакиллиги сайти мусулмонларни Муҳаммад (с.а.в) таваллуд топган робиул аввал ойида пайғамбарга саловот айтишга чорлади.

«Робиул аввал ойи кириб келиши биланоқ, барча мусулмонлар ҳаётида чексиз хурсандчилик, юзларида табассумни кўрасиз. Бунинг сабаби биргина, у ҳам бўлса, оламларга раҳмат этиб юборилган, барча маҳлуқотлар саййиди, қиёмат кунидаги 'Мақоми маҳмуд’ соҳиби бўлган Пайғамбаримиз Муҳаммад Мустафо соллаллоҳу алайҳи васалламнинг таваллуд топган ойларидир», — дейилади хабарда.

Қайд этилишича, бу ой кириши билан кўпчилик мусулмонлар Муҳаммад пайғамбарнинг (с.а.в) сийратларини ўрганишга бошқа ойлардагидан кўра кўпроқ эҳтимом қилади.

«Расулуллоҳ соллаллоҳу алайҳи васаллам сийратларини ўрганган инсон У зотга саловот йўллашликдан тили ҳам, қалби ҳам чарчамайди. Аллоҳ таоло барчамизга робиул аввал ойида Пайғамбаримиз соллаллоҳу алайҳи васалламга кўплаб саловотлар айтиб, улкан ажрларга эга бўлишимизни насиб этсин!», — дейилади хабарда.