Ўзбекистон делегацияси Жанубий Кореянинг етакчи олий таълим даргоҳлари билан музокаралар олиб бормоқда. Бу ҳақда «Дарё»га Ўзбекистон Президентининг Жанубий Кореяга давлат ташрифи бўйича матбуот маркази маълум қилди.
Ўзбекистон ахборот технологиялари ва коммуникацияларини ривожлантириш вазири в.б. Шерзод Шерматов, олий ва ўрта махсус таълим вазири Ином Мажидов ва Тошкент шаҳридаги Инҳа университети ректори Сарвар Бобохўжаев таркибидаги делегация ОТМлар раҳбарияти билан музокаралар олиб борди. Учрашувлар Ўзбекистон Президентининг Корея Республикасига уюштирадиган ташрифи арафасида ўтказилди.
Жанубий Кореянинг уч етакчи университети умумий қилиб SKYUniversities дейилади. Бу сўз университетлар номларининг биринчи ҳарфларидан тузилган. Булар — Сеул миллий университети (Seoul National University), Корё университети (Korea University) ва Ёнсей университети (Yonsei University).
Ўзбекистон делегацияси самарадор ҳамкорлик ўрнатиш учун айнан шу университетлар раҳбарияти билан учрашувлар ўтказди. Шунингдек, Ханянг технология университети (Hanyang University) раҳбарияти билан музокаралар олиб борилди.
Суҳбат давомида томонлар мазкур университетларнинг филиалларини Ўзбекистонда очиш, шунингдек, ҳамкорликнинг бошқа истиқболли масалаларини кўриб чиқди.
Изоҳ (0)