Республика тиббиёт муассасаларидаги етакчи мутахассисларнинг вилоятларда ишлаш ташаббуси ҳудудларда «энг ноёб ва юқори технологик операциялар»ни ўтказиш имкониятини пайдо қилмоқда, дея хабар бермоқда Ўзбекистон Соғлиқни сақлаш вазирлиги (ССВ) матбуот хизмати.
Хабар беришларича, биргина Самарқанд вилоятида Тошкентдан борган турли ихтисосликдаги 8 нафар малакали мутахассис иш бошлади. Натижада Республика ихтисослаштирилган онкология ва радиология илмий-амалий тиббиёт марказининг Самарқанд филиалида бир қатор турдаги жарроҳлик амалиётлари илк бор амалга оширилди.
Филиалда фаолият бошлаганимдан буён ўтган қисқа вақт ичида илгари фақат Тошкентда ёки хорижда қилинган тўрт турдаги энг мураккаб жарроҳлик амалиётларини филиалнинг ўзида ёш мутахассислар билан бирга бажардик. Мисол учун, қизилўнгач, ошқозон, меъда ости бези, йўғон ичак, жигар саратони хасталикларини самарали даволаш имконияти ошмоқда.Қизилўнгач саратонида аъзонинг 80 фоизини олиб, унинг ўрнига ошқозондан трубка ясаб, кўкрак бўшлиғига улаш, жигар саратонида жигарнинг 60—65 фоизини резексия қилиш, сунъий ошқозон яратиш каби ноёб операциялар Самарқанд тиббиёти тарихида илк бор бажарилди.
Ҳозирга қадар 22 та шундай операция ўтказган бўлсак, уларнинг барчаси муваффақиятли ўтди. Энди ҳар қандай мураккаб жарроҳлик ишларини филиалнинг ўзида бажариш имконияти борлиги самарқандликларни қувонтирмоқда.
Миржалол Жўраев, Республика ихтисослаштирилган онкология ва радиология илмий-амалий тиббиёт маркази Самарқанд филиали директори
Изоҳ (0)