Навоий кон-металлургия комбинати тасарруфидаги ёнғин хавфсизлиги қисмларининг моддий-техника базаси мустаҳкамланмоқда. Бу ҳақда НКМК матбуот хизмати маълум қилди.
Жумладан, йил бошидан буён 5-кон бошқармаси ёнғин хавфсизлиги бўлими, Зарафшон шаҳридаги 2, Учқудуқ туманидаги 6- ҳарбийлаштирилган ёнғин хавфсизлиги қисмларига Isuzu русумли ёнғин ўчириш автомобиллари берилди.
Яқинда JV MAN Avto Uzbekistan корхонасида ишлаб чиқарилган, қиймати 1,3 миллиард сўм бўлган энг замонавий MAN автомобили Марказий кон бошқармаси объектларини ёнғиндан муҳофаза қилувчи ёнғин хавфсизлиги бўлимига топширилиб, ҳисобга қўйилди.
Янги техника воситаси қатор қулайликларга эга. Унда 4 минг литр сув сиғими ҳамда 400 литр кўпик ҳосил қилувчи суюқлик билан тўлдирилган сиғим мавжуд бўлиб, автомобилнинг махсус ёнғин ўчириш дастаги сувни 50-60 метр масофагача сепа олади. Мазкур автомобиль ёнғин ва фавқулодда ҳолатлар содир бўлган манзилга шахсий таркиб билан бирга ёнғинни ўчириш аслаҳаларини ҳам олиб юришга мўлжалланган.
Изоҳ (0)