Жасурбек Иброҳимов иши юзасидан суд мажлисларига раислик қилган Миробод туман жиноий ишлар бўйича суди раиси ўринбосари Матчонбой Матчонов айбланучи Исломбек Тўлагановга ҳукм ўқилганидан сўнг журналистларнинг саволларига жавоб берди. Бу ҳақда «Газета.uz» хабар бермоқда.
Эслатиб ўтамиз, 30 октябрь, душанба куни Боровский номидаги тиббиёт коллежи ўқувчиси Жасурбек Иброҳимовнинг ўлими юзасидан Исломбек Тўлагановни олти йилга озодликдан маҳрум этиш бўйича ҳукм чиқарди.
Ўз навбатида, адвокат Лола Исмаилова жабрланувчи томоннинг Миробод тумани ИИБ олиб борган терговдан, шунингдек, дастлабки тергов органлари ихтилофнинг барча иштирокчилари телефон қўнғироқлари ҳақидаги маълумотларини олмаганидан норози эканлигини билдирди. «Газета.uz» мухбирининг бу борадаги саволига жавоб бераркан, Матчонбой Матчонов дастлабки тергов ишлари амалдаги қонунчиликка мувофиқ олиб борилганини айтди. Унинг сўзларига қараганда, акс ҳолда суд хусусий тушунтириш чиқариб, дастлабки тергов камчиликларини кўрсатган бўларди.
«Телефон қўнғироқлари ва бошқа гувоҳларга келадиган бўлсак, қонунга мувофиқ, биз телефон қўнғироқлари ҳақида маълумот сўрашга ҳақли эмасмиз. Бундан ташқари, ҳимоя томони судга конкрет сўров киритмади. Конкрет фуқароларга оид телефон қўнғироқлари ва бошқа ҳужжатлар сўралганда, улар қандай мақсадда сўралгани асослаб берилиши лозим. Фойдаланиш учун сўрай олмаймиз. Бу шахсларнинг ҳуқуқларини бузиш бўлади», — деди у.
Ўқитувчилар ва шифокорларга қарши санкциялар кўрилиши мумкинлиги ҳақида гапирар экан, судья олий ва ўрта махсус вазирлиги учун шахсий кўрсатма чиқарилганини маълум қилди.
«Унинг асосида жавобгар шахслар, ўйлайманки, меҳнат қонунчлиги, йўриқномалар ва бошқа ҳужжатларга мувофиқ жазосини олади. Уларни хатти-ҳаракатларида ҳозирча жиноят қонунчилиги бузилишини аниқламадик. Балки, маъмурий қонунбузарлик бордир. Вазирликлар ташаббускорлар бўлади», — деди судья.
Гувоҳлар Бекзод Собиров, Темур Тўхтаев, Темур Байзитов, Ҳурмат Ҳайитбоев ва Муҳаммад Пўлатовларнинг ҳаракатларида ҳам суд томонидан жиноий иш очишга сабаб бўладиган сабаблар топилмади, деб аниқлаштирди Матчонбой Матчонов.
Адвокат Лола Исмаилова журналистлар билан мулоқот чоғида жабрланувчи томон Исломбек Тўлагановга белгиланган жазони тўғри деб ҳисоблашини таъкидлаб ўтди.
«Эътирозимиз йўқ, бу тўғри мухлат. Лекин, бизнинг фикримизча, барибир унинг камида битта ҳамтовоғи бор. Акс ҳолда нега болалар унинг тарафини олди», — деди у.
Лола Исмаилова телефон қўнғироқлари ҳақидаги маълумотлар нега сўралганига аниқлик киритиб ўтди:
«Даставвал машғулотлардан ўн дақиқага ўтиб Байзитовга қўнғироқ бўлган. Агар улар бирга бўлса, қўнғироқ бўлармиди? Бу бўлмаган гап. Фикримча, улар бир-бирини машғулотлардан чиқариб, муштлашувга борган».
Адвокат жабрланувчи томони суд қарори устидан шикоят қилмай, муштлашувнинг бошқа иштирокчилари юзасидан прокуратурага мурожаат этиши мумкинлигини айтди.
Изоҳ (0)