Ижтимоий тармоқларда Вазирлар Маҳкамасининг Таълим ва илм-фан масалалари ахборот-таҳлил департаменти томонидан 2017 йилнинг 11 октябрида Ахборот технологиялари ва коммуникацияларини ривожлантириш ҳамда Олий ва ўрта махсус таълим вазирликларига юборилган хат тарқалди. Ахборот технологиялари ва коммуникацияларини ривожлантириш вазирлиги ушбу хат сохта эканлигини тасдиқлади, деб хабар берди «Xabar.uz».
Хатда шундай ёзилган:
«2018—2019-ўқув йилида Ўзбекистон Республикасининг олий таълим муассасаларига ўқишга қабул қилиш учун ўтказиладиган тест синовлари натижаларини тезкор таҳлил қилиб, натижаларни 2 кун муддатда эълон қилиш учун дастурий таъминот яратиш бўйича очиқ танлов ўтказилиб, энг яхши дастурий таъминот эгасини 55 000 000 (эллик беш миллион) сўм миқдорида пул мукофоти билан тақдирлаш ёки 2018—2019-ўқув йилида Тошкент ахборот технологиялари университетига тест синовларисиз ўқишга қабул қилишга розилик берилди.
Белгиланган тартибда расмийлаштиршингизни сўрайман».
Мазкур хатда Ўзбекистон Республикасининг «Норматив-ҳуқуқий ҳужжатлар тўғрисида»ги Қонуни, Вазирлар Маҳкамасининг 1997 йил 9 октябрдаги «Вазирликлар, давлат қўмиталари ва идоралар меъёрий ҳужжатларининг қонунийлигини таъминлаш чора-тадбирлари тўғрисида»ги ҳамда 2000 йил 19 майдаги «Вазирликлар, давлат қўмиталари ва идораларнинг меъёрий ҳужжатларини қабул қилиш тартибини такомиллаштириш тўғрисида»ги қарорлари, Ўзбекистон Республикаси адлия вазирининг 2014 йил 28 февралдаги 53-мҳ-сон буйруғи билан тасдиқланган Идоравий норматив-ҳуқуқий ҳужжатларни тайёрлаш ва қабул қилиш қоидалари талаблари қўпол равишда бузилган.
Хусусан, одатда расмий хат-ҳужжатларга имзо чекувчининг лавозими қайд этилади. Юқоридаги ҳужжатда Б.Онорбоевнинг лавозими кўрсатилмаган. Шунингдек, хат юборилаётган ташкилотларнинг фақатгина номи ёзилади, юқоридаги ҳужжатда эса бунинг аксини кўриш мумкин. Бундан кўриниб турибдики, сохталаштирувчи республикада норматив-ҳуқуқий ҳужжатларга қўйиладиган талаблардан бехабар.
Эслатиб ўтамиз, давлат ҳокимияти ва бошқаруви органларига оид ҳужжатларни сохталаштирганлик, жамоатчилик ўртасида ёлғон маълумот тарқатиш Ўзбекистон қонунчилигига кўра таъқиб қилиниши, айбдорлар қонунда белгиланган тартибда жавобгарликка тортилиши мумкин.
Изоҳ (0)