6 октябрь, жума куни оқшомда номаълум шахслар Москва Қизил майдонидаги Ленин мавзолейига қўнғироқ қилиб, у ерга бомба ўрнатилганини ҳақида хабар берган, дея хабар бермоқда Meduza.
Қўнғироқ қилган шахс «Ленин мавзолейига бомба қўйилгани ва ҳамма ўлиши»ни маълум қилган. Мавзолей маъмурияти бинода эвакуация тадбирларини амалга оширмасликка қарор қилган; бино кинологлар томонидан кўздан кечирилган ва улар ҳеч қандай портловчи ускуналар топмаган.
Мавзолей жумадан душанбага қадар ишламайди (қолган кунлар соат 10:00 дан 13:00 гача очиқ бўлади). Жума куни оқшомда мавзолейда (Лениндан ташқари) бирор одам бўлганми ёки йўқ — номаълум. Мавзолей вакилларидан бу борада изоҳ олиш имкони бўлмаган.
Мавзолейдан ташқари, жума куни Москва шаҳрида 150 дан зиёд бошқа бинолар ҳам «миналаштирилгани» ҳақида ёлғон хабарлар келиб тушган. Бирор жойда портловчи ускуналар топилмаган.
Россияда 10 сентябрдан бери у ёки бу биноларга бомба қўйилгани ҳақидаги аноним қўнғироқлар давом этмоқда. Номаълум шахслар савдо марказлари, маъмурий бинолар, мактаб ва бошқа муассасаларга бомба қўйилгани ҳақида хабар бермоқда.
Изоҳ (0)