2 тонна ош дамлаган марғилонлик ошпаз энди 2 минг литрлик шўрва қайнатди

Марғилонлик 23 ёшли ошпаз Муҳаммадали Ҳайитбоев 2 минг литрлик шўрва қайнатди. Бу ҳақда «Kun.uz» хабар берди.

Таомни тайёрлаш учун 300 килограмм гўшт, 100 килограмм суяк, 50 килограмм мол ёғи, 100 килограмм пиёз, 6 килорамм туз, 16 килограмм қизил ва кўк булғор қалампири, 10 килограмм помидор, 500 грамм саримсоқ пиёз, 400 грамм зира, 500 грамм қизартиргич, 300 грамм кашнич, 200 грамм зирк, 200 грамм мурч ҳамда 2 минг литр сувдан фойдаланган.

Муҳаммадали Ҳайитбоев бундан аввал Марғилонда ташкил этилган «Атлас фестивали»да 2 тонналик палов тайёрлаган эди.

Қайд этиш жоиз, Тошкентда 8 сентябрь куни «Ўзбегим» фестивали доирасида оғирлиги 7 тоннадан зиёд палов тайёрланган ва бу таом Гиннеснинг рекордлар китобидан ўрин олган эди.

Бундан аввал, рекордчи мегапаловга тайёргарлик сифатида, 17 август куни Олмалиқ шаҳрида оғирлиги 6 тонна бўлган палов тайёрланган эди.