Москванинг беш юлдузли меҳмонхоналарида бўш жой қолмади: Саудия подшоҳи Россияга келди

Саудия Арабистони подшоҳи Салмон бин Абдул Азиз ас-Сауд 4 октябрь куни Москвага келди — у Россияга ташриф буюрган Саудиянинг илк подшоҳидир. Ташриф 7 октябрь кунига қадар давом этади, дея хабар бермоқда TJournal.

Россия ҳукумати мазкур ташрифга алоҳида тайёргарлик кўрди. 2—8 октябрь кунлари Москвада Саудия Арабистони маданияти кунлари бўлиб ўтади: кўчаларда кўплаб биллбордлар пайдо бўлган. Подшоҳ қўнган Внуково аэропортидан шаҳарга олиб чиқувчи йўл бўйлаб меҳмонларни олқишловчи рекламалар қўйиб чиқилган.

Россия раҳбарияти саудиялик монархнинг ташрифиини тарихий, деб атамоқда. У 5 октябрь куни Москвада президент Владимир Путин билан, 6 октябрь куни эса Россия бош вазири Дмитрий Медведев билан учрашади. Ташриф муносабати билан Саудиянинг нефть қазиб олувчи энг йирик компанияси иштирокида инвестициявий форум ўтказилади. «Ведомости» маълумотларига кўра, Арабистоннинг суверен фонди Москвадаги илк пуллик йўл — Кутузовский шоҳ кўчасини такрорловчи шоссе қурилишини молиялаштирмоқчи.

Минг кишилик делегация қаерда яшайди?

«Калашников» концернининг ташқи муносабатлар бўйича директори София Иванова 3 октябрь куни Facebook’даги саҳифасида Москвадаги беш юлдузли меҳмонхона «бутун дўконлари ва ресторанлари билан бирга» ёпилишини «тасодифан билиб қолгани» ҳақида ёзди. Унинг сўзларига кўра, бу ҳолат Саудия подшоҳининг ташрифи билан тўғридан-тўғри боғлиқ бўлиб, чекловлар 7 октябрда олиб ташланади.

Кейинроқ Иванова «адашиб кетиб» Ritz-Carlton меҳмонхонаси ҳақида ёзгани, аслида гап Four Seasons ҳақида бораётганини ёзди. Мазкур меҳмонхоналар тармоғининг Москвадаги энг машҳур отели Қизил майдон, Кремль ва Давлат думаси ёнида жойлашган.

Four Seasons тасодифан танланмаган: подшоҳ бу тармоқ меҳмонхоналарида бир неча бор, уларнинг барча хоналарини банд қилгани ҳолда тўхтаган. ОАВ маълумотларига кўра, тармоқда подшоҳнинг жияни шаҳзода ал-Волиднинг улуши бор.

Кейинроқ Москвадаги беш юлдузли меҳмонхоналарга талаб кескин ошиб кетгани ҳақидаги хабарларни «РИА Новости» ҳам тасдиқлади. Меҳмонхоналарнинг вакиллари подшоҳ делегацияси вакиллари Кремль ва Қизил майдон атрофидаги, Манежний майдони, Лубянка ва Кузнецкий кўприги яқинидаги барча юқори даражадаги бўш хоналарни банд қилаётганини билдирди. Делегация бир вақтнинг ўзида бир неча меҳмонхонада истиқомат қилаётган бўлиб, улар орасида Four Seasons, St. Regis ва «Национал» бор.

Агентлик маълумотларига кўра, подшоҳнинг ташрифи кунлари Кремль атрофидаги беш юлдузли меҳмонхоналардан жой банд қилиш имкони йўқ. Бундай ҳолат камдан-кам, одатда «катта гуруҳ бўлиб уюштирилган ташрифлар» вақтида кузатилади. Four Seasons’даги энг қиммат ва энг катта — майдони 500 квадрат метр бўлган хонанинг бир кунлик ҳақи қарийб бир миллион рубль (17 минг доллар)га тенг.

Меҳмонхоналарнинг баъзи хоналари подшоҳ ташрифи учун алоҳида тайёрланган: Ар-Риёддан гиламлар ва хос мебеллар келтирилган (масалан, паст ёғоч каравотлар). Ташриф якунлангач, «Осиё анжомлар» омборга қўйилади. Бошқа ўзгаришлар ҳам бор — менюдан чўчқа гўштили таомлар вақтинча чиқариб ташланган.

Саудия Арабистони подшоҳи делегацияси одатда «оғир вазн»да ташриф буюради. 2017 йил мартида Индонезияга уюштирилган тўққиз кунлик ташриф давомида делегация ўзи билан 459 тонна юк, иккита Mercedes S600 автомобили ва иккита электр лифт олиб келганди. Ўшанда 800 кишилик делегация 27 рейс давомида манзилга етказилган.