Каталониядаги сайлов участкасида юз берган отишма оқибатида тўрт киши яраланди

Каталониядаги сайлов участкаларидан бирида юз берган отишма оқибатида камида тўрт киши жабрланди. Бу ҳақда «РБК» хабар бермоқда.

La Vanguardia нашри маълумотларига кўра, ҳодиса Манльеу шаҳридаги сайлов участкаларидан бири жойлашган мактабда юз берган.

Ҳужум қилган шахс пневматик қуролдан шарчалар отиб, отишма келтириб чиқарган. Оқибатда тўрт киши кўкраги ва бўйнидан яраланган.

Жабрланганларга биринчи тиббий ёрдам кўрсатилган. Яраланганларнинг уч нафари Референдумни ҳимоя қилиш қўмитаси аъзоларидир. Улар полицияга шикоят қилган.

Манльеу шаҳри мэри — референдум тарафдори Алекс Гарридо Серра мазкур ҳодисани «фашистик ҳужум» деб атаб, демократияни тинч йўл билан ҳимоя қилишга чорлади.

Каталония ҳукумати режасига кўра, референдум 1 октябрь, якшанба куни маҳаллий вақт билан 9:00 да (Тошкент вақти билан 12:00 да) бошланиши керак. Сайлов участкалари 20:00 гача очиқ бўлади. Бироқ Испания ҳукумати ҳеч қандай овоз бериш бўлмаслиги, референдум «давлат томонидан бекор қилингани»ни таъкидламоқда.