Андижон вилояти божхона бошқармаси ходимлари тилла ва заргарлик буюмларининг ноқонуний олиб кирилишига доир навбатдаги божхона қоидабузарлигини фош қилди. Бу ҳақда Андижон вилояти божхона бошқармаси ахборот хизмати хабар бермоқда.
«Дўстлик» чегара божхона комплекси орқали қўшни давлатдан кириб келаётган хорижий фуқаро З.Тўхтасинова белгиланган тартибда ва холислар иштирокида шахсий кўрикдан ўтказилганда йўловчи божхона декларациясида ва божхона ходимларининг оғзаки сўрови пайтида маълум қилмасдан туриб, 31 дона тилла тақинчоқларни олиб киришга урингани фош бўлди.
Ушбу аёл узук ва сирғаларни кўйлагининг ёқаси остига яширинча тикиб қўйган, шунингдек, 1 дона занжирни кўйлагининг узун енги остидан билагига ўраб олган экан.
Шу тариқа З.Тўхтасинова қиймати салкам 23 миллион сўмлик 114,6 грамм тиллаларни ноқонуний равишда олиб кирмоқчи бўлган.
Ҳозирда мазкур ҳолат юзасидан божхона текширувлари ва суриштирув жараёнлари давом эттирилмоқда.
Маълумот учун, Ўзбекистон Республикаси худудига жисмоний шахслар томонидан товарларни аксиз солиғи солинмасдан олиб киришнинг рухсат этилган меъёрларига мувофиқ умумий оғирлиги 30 граммдан ортиқ бўлмаган қимматбаҳо тошлар ва кимматбаҳо металдан тайёрланган 5 донагача заргарлик буюмларини олиб киришга рухсат этилади.
Изоҳ (0)