Дональд Трамп АҚШ президенти лавозимини эгаллаганидан бери биринчи бор афв этиш ҳақидаги қарорга имзо чекди. Оқ уй матбуот хизматининг маълум қилишича, 26 август, шанба куни эълон қилинган ҳужжатга мувофиқ, Аризона штати Марикопа округининг собиқ шерифи, 85 ёшли Жо Арпаёдан барча айбловлар олиб ташланган. У судга нисбатан ҳурматсизлик юзасидан айбдор дея топилган эди, деб хабар берди «ТАСС».
«Бугун АҚШ президенти Дональд Трамп Марикопа округи собиқ шерифи Жо Арпаёни афв этиш бўйиш бўйича қарорга имзо чекди. АҚШ Қуролли кучлари таркибига Корея уруши бошланганидан сўнг, 18 ёшида ёзилган Арпаё жамиятга хизмат қилишнинг фидокорона намунасидир… Ҳозирда шериф Жо Арпаё 85 ёшда ва 50 йилдан ортиқ халқ учун беминнат хизмат қилгани президентлик афвига муносиб номзод эканлигини кўрсатади», — дейилади хабарда.
Жо Арпаё Барак Обама АҚШ президенти этиб сайлангач, мазкур сайлов жараёнини кескин танқид қилгани билан машҳур. Ўшанда Арпаё мамлакат раҳбари АҚШдан ташқарида туғилганини, унинг туғилганлик ҳақидаги гувоҳномаси сохталаштирилганини таъкидлаган эди. Трамп ҳам президентликка киришгунига қадар Обама ҳақида шу каби фикрларни бир неча бор такрорлаган.
2013 йилда федерал суд Арпаё ўтказган Лотин Америкасидан бўлган ноқонуний иммигратларни қўлга олиш операциясини қонунга зид дея топган. Шериф суд қарорига амал қилмаган ва мигрантларни қўлга олишда давом этаверган. 2017 йилнинг июлида Арпаё судга нисбатан ҳурматсизлик қилгани учун айбдор деб топилган эди. Унга нисбатан якуний ҳукм жорий йилнинг октябрида ўқилиши керак эди.
Изоҳ (0)