Кеча — 21 август куни футбол бўйича Англия Премьер-лигасида 2-тур беллашувларига якун ясалди. Унинг сўнгги ўйинида «Манчестер Сити» ва «Эвертон» клублари ўзаро дуранг ўйнади.
Манчестер шаҳрида ташриф буюрган «Эвертон» 35-дақиқада Уэйн Рунининг голи билан олдинга чиқиб олди. Бир тур аввал Руни «Эвертон»га қайтишидаги илк расмий ўйинини «Сток Сити»га қарши ўтказиб, жамоасига ғалаба тақдим этган ягона голга муаллифлик қилганди.
Учрашувдан кейин Руни «Сити»га қарши ўйиндаги голидан Манчестернинг қизил қисми ҳам хурсанд бўлгани ҳақида айтди. Боиси Жозе Моуриньо бошқараётган «Юнайтед» кетма-кет икки йирик ғалабага эришиб, 6 очко тўплаганди. Рунининг голи сабаб «Юнайтед»нинг асосий рақобатчиси ҳисобланган «Сити» 2 очко йўқотди.
«Манчестер Сити» илк турда лига дебютанти «Брайтон» меҳмони бўлиб, 2:0 ҳисобида устун келганди.
Англия Премьер-лигаси 2-тур беллашуви 21 август, душанба
«Манчестер Сити» — «Эвертон» 1:1
Голлар: Уэйн Руни, 35 (0:1). Раҳим Стерлинг, 83 (1:1).Четлатишлар: Кайл Уокер, 44 (М). Морган Шнедерлен, 88 (Э).