Nokia HMD Global раҳбарлигида ниҳоят ўзининг илк флагмани — Nokia 8 ни тақдим этди. Бу ҳақда «Hi-Tech Mail.ru» хабар бермоқда.
Смартфон янги Nokia’га хос умумий услубни сақлаб қолган. Қирралари думалоқ шаклли металл корпусдан иборат смартфоннинг олд панели бармоқ изи сканери ва сенсорли клавишга эга.
Қурилма учун камералар ишлаб чиқишда Германиянинг Carl Zeiss компанияси яқиндан кўмак берди. Nokia 8 смартфони 13 мегапикселли икки модул билан жиҳозланди: сенсорлардан бири рангли, иккинчиси эса монохром. Иккинчи модул смартфонга оқ-қора тартибда тасвирга олиш имконини беради.
Смартфон учта микрофон туфайли овоз ёзишнинг 360 даражали технологияси — OZO Audio’да ишлай олади. Android 7.1.1 тизимининг замонавий версияси билан таъминланган. Чип эса тўрт ядроли Qualcomm Snapdragon 835 дан иборат.
Nokia 8 смартфони 670 доллар атрофида сотувга чиқиши кутилмоқда.