Жанубий Корея Хитойга мамлакатда АҚШнинг THAAD комплекслари жойлаштирилишини муҳокама этишни таклиф қилди

Жанубий Корея мамлакатда THAAD ракетага қарши мудофаа тизими жойлаштирилиши бўйича АҚШ ва Хитой иштирокида уч томонлама маслаҳатлашувлар ўтказишни таклиф этди. Бу ҳақда Yonhap манбасига таяниб, «ТАСС» хабар бермоқда.

«Президент Мун Чжэ Иннинг Си Цзиньпин билан шу йил июль ойида Гамбургда, G20 саммити доирасидаги учрашувида мазкур таклиф билдирилган. Хитой раҳбари таклифга ўша заҳоти жавоб бермади», — дейилади агентлик хабарида.

Жанубий Корея президенти маъмурияти ушбу маълумотни изоҳлашдан бош тортди. «Президент Муннинг бошқа давлат раҳбарлари билан музокаралари тафсилотларини муҳокама этишни номақбул деб биламиз», дея таъкидлади маъмурият вакили.

Маълумот учун, Сеул 2016 йил июнида мамлакат ҳудудида АҚШнинг THAAD зенит-ракета комплексларини жойлаштирилиш ҳақида қарор қабул қилганди.