Билл Гейтс 17 йил ичидаги энг йирик — 4,6 млрд долларлик хайрияни амалга оширди

Microsoft компанияси асосчиси ва дунёнинг энг бадавлат кишиси Билл Гейтс 2000 йилдан буён энг йирик хайрияни амалга оширди, деб ёзади «ТАСС» АҚШ қимматли қоғозлар ва биржалар комиссиясига таяниб.

61 ёшли миллиардер ўз компаниясининг 4,6 миллиард долларлик акцияларини 6 июндаёқ хайрия қилган эди. Уларни қайси ташкилот қабул қилиб олгани маълум қилинмаяпти.

Bloomberg таъкидлашича, филантроп одатда энг катта хайрияларни ўзи ва рафиқасига тегишли Bill & Melinda Gates Foundation жамғармасига беради.

Гейтс хайрия фаолиятига киритган энг йирик сумма 16 миллиард доллар бўлган ва у 1999 йилда амалга оширилган, бир йил ўтиб эса 5,1 миллиард доллар хайрия қилган. 1994 йилдан буён хайрия учун ажратган маблағлари эса қарийб 35 миллиард долларни ташкил этади.