Тошкент бозорларида банкоматлар ишга тушди (фото)

Тошкент шаҳрининг Олой, Юнусобод ва Қўйлиқ бозорларида 14 августдан бошлаб пулни нақдлаштириб берадиган банкоматлар ишлай бошлади. Ҳар бир бозорда биттадан банкомат ўрнатилган. Бу ҳақда UZ24 хабар бермоқда.

Соат 9:00 да Халқ банки ходими Олой бозоридаги банкоматни ишга туширди. Банкомат учун махсус контейнерларда пуллар келтирилди. Банк ходими қурилмани дастурлаганидан сўнг, илк фойдаланувчи банкомат орқали пулларини нақдлаштириб олишга муваффақ бўлди.

Жараён 1,5—2 дақиқа давом этади. Ҳар бир картадан комиссиясиз 100 минг сўмгача пулни ечиб олиш мумкин. Маблағ 1 000, 5 000 ва 10 000 сўм бўлган купюраларда берилади.

Банкомат исталган банкка тегишли ва Uzcard тизимига уланган пластик картани қабул қилади.

Банкнинг Юнусобод филиали ходими Ғайратжон Худоёровга кўра, банкоматлар соат 9:00 дан 18:00 гача ишлайди. Кун давомида ўртача 200—300 киши пулларини нақдлаштириб олиши мумкин.

Бир киши бир нечта картадан 100 минг сўмгача бўлган маблағни нақдлаштириш имконига эга.