Сергелидаги қурилиш қилиб бўлмайдиган ерда 10 минг туп олма экилди

Сергели туманида 2016 йили бўш ётган 3,2 гектар майдон ободонлаштирилиб, бу ерда шаҳар шароитида учрамайдиган интенсив олма боғи ташкил этилган эди.

Ҳокимлик мутасаддиларининг «Дарё»га маълум қилишича, темирйўл ёқасидаги ушбу ҳудуддан юқори кучланишдаги электр тармоқлари ўтган бўлиб, бу ерда капитал қурилиш ишларини бажариш мумкин эмас. Шу боис ҳудуд кўпдан бери қаровсиз ва бўш ётган.

Хабар беришларича, шаҳар шароитида яратилган боғда «Салтанат», «Жеромин», «Голден», «Pink Леди» ва «Гала» каби навлардаги 10 минг туп пакана ва ярим пакана олма кўчатлари экилган бўлиб, улар томчилатиб суғориш тизими билан суғорилади.

«2017 йилдан бошлаб мазкур боғда етиштирилган олмалар Сергели тумани ҳудудидаги деҳқон бозорларининг ‘Элга хизмат’ расталаларида арзонлаштирилган нархларда сотилмоқда», — дейди ҳокимлик вакили.

Ҳокимлик мутасаддиларининг фикрича, Тошкент шаҳридаги бўш ётган, ерости коммуникациялари, юқори кучланишдаги электр тармоқлари ўтган, капитал қурилиш мумкин бўлмаган, темир йўл ёқасидаги ерларда шундай боғларни ташкил этиш экологик вазиятни яхшилашга ҳамда аҳолини сифатли ва арзон мева маҳсулотларига бўлган эҳтиёжини қондиришга хизмат қилади.