Америка эсминеци Жанубий Хитой денгизидаги Спратли оролига яқинлашгани сабаб Хитой АҚШни ўз суверенитети ҳамда халқаро ҳуқуқларни қўпол равишда бузишда айблади. Бу ҳақда «РИА Новости»га таяниб, «Корреспондент.net» хабар берди.
Хитой Ташқи ишлар вазирлигининг расмий вакили Ген Шуаннинг баёнотида айтилишича, Американинг Жон С. Маккейн эсминеци Хитой ҳукуматининг рухсатисиз Нанша (Спратли) оролига яқинлашган.
Хитой Ташқи ишлар вазирлиги АҚШнинг ҳаракатидан норози эканлигини билдирди.
«Америка томонидан амалга оширилаётган бу каби фитналар Хитойни ўз ҳудудининг хавфсизлигини таъминлаш чораларини кучайтиришига мажбур қилмоқда», — деди вазирлик вакили.
Ўз навбатида Хитой Мудофаа вазирлиги АҚШни Жанубий Хитой денгизидаги фитналарни дарҳол тўхтатишга чақирди.
«Айни вақтда Хитой ҳамда АҚШ қуролли кучлари ўртасидаги муносабатлар ўз ривожланишини ишончли тарзда намойиш қилмоқда. Бироқ АҚШ томонидан амалга оширилаётган бу каби фитналар икки томонлама стратегик ишончга жиддий зарар етказади», — дейилади вазирлик баёнотида.
Изоҳ (0)