Ўзбекистонлик ҳайдовчиларнинг Facebook’даги энг оммабоп гуруҳлари — «Водители Ташкента» ва «Водители Ташкента (Drivers.uz)» гуруҳларида шохли ва мўйнали Ford’нинг суратлари тарқалди. Автомобиль чет эллик меҳмонники экани яққол сезилади.
Фойдаланувчилар мазкур машинага турлича муносабат билдирган. «Буқа-ку!», — деб таъриф берган фойдаланувчилардан бири. «Бу машинани ювиш учун алоҳида шампун керак бўлса керак», — деб тасаввур қилган бошқа бир фойдаланувчи.
«Викинглар Тошкентда!», — деб ёзган яна бир фойдаланувчи. Бошқалар эса бу викинглар эмас, балки британиялик саёҳатчилар экани, улар Шотландиядан Мўғулистонга сафар қилаётганини таъкидлаган. «Мўғулистондаги ёввойи ҳайвонлар тўдаси ичида мени сезмай қолишади, деб ўйлаётган бўлса керак», — деб ҳазил қилган улардан бири.
Ҳақиқатан ҳам, мазкур Ford автомобили сайёрадаги энг қизиқарли саёҳат пойгаларидан бири — Mongol Rally’да иштирок этаётган Team Jackie Moo Art жамоасига тегишли. Жамоа Шотландиядан Мўғулистонгача бўлган йўлни босиб ўтиш ҳамда деменсия касаллигига қарши кураш учун хайрия маблағларини тўплашни мақсад қилган.
«Буқа машина» узоқ йўлдаги кечмишини Twitter’даги саҳифасида ёзиб боради. Хусусан, машина 5 август куни Туркманистон пойтахти Ашхободдан ўтган бўлса, 7 август куни Ўзбекистондаги илк твитини ёзган эди. «Машина Ўзбекистонда чуқурларга тўла йўлда икки ғилдирагидан айрилди. Бухорогача қолган 15 километрни уч ғилдиракда босиб ўтди», — дейилади биринчи хабарда.
Morag wiped out TWO wheels on Uzbekistan pothole strewn road. Limped last 15km into Bukhara on three wheels@PeoplesFord #Moragthecowcar pic.twitter.com/yIc5sMZCMQ
— Morag The Cow Car (@MoragTheCowCar) August 7, 2017
Худди шу куни чиқарилган иккинчи твитда шотландияликлар Ўзбекистонда ёнилғи муаммосига дуч келганини англаш мумкин: «Ўзбекистонда бензин топиш мушкул. Машина ўз чанқоғини зудлик билан ‘қора бозор’ орқали қондириши керак бўлди». 9—10 август кунлари «буқа машина» Тошкент кўчаларида суратга олинган ва ҳозир, катта эҳтимол билан, Қозоғистонга чиқиб кетган.
Petrol hard to get in Uzbekistan. Thirsty Morag needed urgent black market top up@PeoplesFord #moragthecowcar pic.twitter.com/WOpCxUl4VE
— Morag The Cow Car (@MoragTheCowCar) August 7, 2017
Умуман, бу йилги Mongol Rally’да 311 жамоа қатнашаётган бўлиб, пойгада иштирок этаётган кўплаб машиналар ҳали Ўзбекистондан ўтиши мумкин.
Изоҳ (0)