Хитой 25 йил ичида Ўзбекистонга 9 млрд доллар молиявий маблағ тақдим этди

Хитой Ўзбекистоннинг асосий савдо ва инвестицион шеригидир. Бу ҳақда Хитойнинг Ўзбекистондаги элчихонаси савдо-иқтисодий масалалар бўйича маслаҳатчиси Цзинь Юйлун айтиб ўтди, деб ёзади UzDaily. Унинг маълумотларига кўра, 25 йил ичида Хитой Ўзбекистонга 9 миллиард долларлик кредитлар, грантлар ва беғараз ёрдам тақдим этган.

Унинг таъкидлашича, 25 йил ичида Хитой имтиёзли ва тижорат кредитлари ҳисобидан Ўзбекистон электр энергетикаси, кўмир қазиб чиқариш саноати, гидроэнергетика, кимё саноати, авиақатнов, темир йўл транспорти каби соҳаларда 60 дан ортиқ лойиҳаларни амалга оширган ва оширмоқда.

Цзинь Юйлун сўзларига кўра, Хитой томони Ўзбекистонга таълим, тиббиёт, божхона, маданият, қишлоқ хўжалиги, гидроиншоотлар, хавфсизлик соҳаларида 40 дан ортиқ лойиҳаларни амалга ошириш учун беғараз кўмак тақдим этган.

Унинг эслатишича, бугунги кунда Хитойнинг Ўзбекистондаги инвестициялари умумий ҳажми 7,8 миллиард доллардан ошади. 700 дан зиёд Хитой корхоналари ва қўшма корхоналар Ўзбекистон ҳудудида мамлакат халқ хўжалигининг турли соҳаларида ўз фаолиятини олиб бормоқда.