Косаткаларни тадқиқ этиш бўйича Узоқ Шарқ лойиҳаси (FEROP) гуруҳи тадқиқотчилари Камчатка соҳиллари яқинидаги кузатувлар тарихида илк бор косаткалар тўдасининг 12 метрли китга ҳужумини видеога туширишга муваффақ бўлди. Бу ҳақда TJournal хабар бермоқда.
Санкт-Петербург давлат университети илмий ходими, биолог Татьяна Ивковичнинг сўзларига кўра, улар бунгача косаткалар томонидан китнинг тановул қилинаётганини кўрган, бироқ биринчи марта бевосита ов жараёнига гувоҳ бўлди.
«Косаткалар тўдаси унча катта бўлмаган, 12 метрли китни обдон қувлади, уни чарчатиб, сўнг ҳужум қилди. Йиртқич косаткалар одатда кичик гуруҳ бўлиб сузади, бироқ китларни овлашга чиққанида, бирлашади. Бу сафарги овда етти жонивор қатнашди, сўнг улар сафига яна тўрт косатка қўшилди», — деди Ивкович.
Биолог-олимнинг сўзларига кўра, тасвирга олиш жараёнида нафақат квадрокоптердан, балки сув остидан чиқаётган овозларни ҳам ёзиб олиш имконини берувчи гидрофонлардан фойдаланилган бўлиб, бу ҳам камёб ҳодиса ҳисобланади.
Изоҳ (0)