Facebook фойдаланувчиси Нариммат Йўлдошев ўз саҳифасида жорий йилнинг 24–25 июнь кунлари Тошкент–Урганч йўналишида чипта сотиб олиш бўйича эътироз ва мулоҳазаларини билдирди. «Ўзтемирйўлйўловчи» акциядорлик жамияти маъмурияти мурожаатдни ўрганиб чиқди ва фойдаланувчига жавоб берди, деб хабар қилади «Darakchi.uz».

Маълумки, 26 июнь куни «Рамазон ҳайити куни» деб эълон қилиниб, дам олиш куни этиб белгиланди. Шу муносабат билан байрам олди вилоятга кетувчи йўловчилар сони бир мунча ортди. Натижада 24–25 июнь кунлари Тошкент–Урганч йўналишида ҳаракатланадиган поездларнинг чипталари ҳаракат кунидан олдин тўлиқ сотиб тугатилди.

Шунингдек, байрам муносабати билан «Ўзбекистон темир йўллари» акциядорлик жамияти томонидан 27 июнь куни вилоятлардан Тошкент шаҳрига келувчи йўловчиларни жой билан таъминлаш мақсадида 26 июнь куни жўнайдиган 58-сонли Тошкент–Шовот поездига қўшимча олтита «плацкарт» вагонлари уланди. Мазкур вагонлар 21–23 июнь кунлари йўналиш ҳаракати таркибига киритилди.

Аниқланишича, 26 июнь куни жўнайдиган 58-сонли Тошкент–Шовот поездининг қўшимча уланган олтита вагонига умумий 31 чипта сотилиб, шундан 21 таси Тошкент–Навоий–Учқудуқ–Урганч йўналишлари бўйича бешта чипта Жиззах–Урганч йўналиши бўйича ва бешта чипта Самарқанд–Урганч йўналиши бўйича расмийлаштирилган.

Facebook фойдаланувчиси Нариммат Йўлдошев постида келтирилган чипта сотувчининг муомаласи ва навбатчининг масъулиятсизлиги бўйича билдирилган фикрлар ҳам чиптахоналарда ўрнатилган видеокамералар орқали ўрганилиб, таҳлил қилинди. Ҳолат постда келтирилган фикрлар каби ўта кескин бўлмасада, ходимларга нисбатан қатъий интизомий чоралар кўрилди.