Кинематография соҳасида норматив-ҳуқуқий базанинг мустаҳкам эмаслиги «Ўзбеккино» миллий агентлиги олдида турган энг катта муаммолардан биридир. Бу ҳақда агентлик матбуот хизмати хабар бермоқда.
Ўтган йилларда соҳага кириб келган рақамли кинотехнологиялар, 3D ва бошқа бир қанча тушунчалар бугунги кунда амалда бўлган ҳужжатларда ўз аксини топмаган.
Ҳозирги кунда хусусий киностудиялар томонидан ишлаб чиқарилаётган ва намойиш учун хориждан олиб келинаётган фильмларни бадиий экспертизадан ўтказиш бўйича ҳам агентликнинг ваколатлари чекланган.
«Шу каби камчиликларни бартараф этиш мақсадида Ўзбекистон Президентининг ‘Миллий кинематографияни янада ривожлантириш чора-тадбирлари тўғрисидаъги қарори лойиҳаси тайёрланиб, тегишли вазирлик ва идоралар билан келишилди ҳамда Вазирлар Маҳкамасига киритилди», — дейилади «Ўзбеккино» ахборотида.
Мазкур қарор лойиҳаси миллий кинематография соҳасининг меъёрий-ҳуқуқий базасини такомиллаштириш, соҳада фаолият кўрсатаётган ижодкорларни қўллаб-қувватлаш, кинематография объектларини тўлиқ реконструкция ва модернизация қилиш, моддий-техник базасини мустаҳкамлаш каби Ўзбекистонда кино санъатини ривожлантиришнинг бошқа йўналишларини ҳам қамраб олади.
Изоҳ (0)