Абдулла Арипов Юнусободдаги мактаб директорини ишдан ҳайдади. Бош вазирга мактаб ҳовлисининг аҳволи ёқмади

Ўзбекистон бош вазири Абдулла Арипов Юнусобод туманига ташрифи давомида бир мактаб директорини ишдан четлатди. Бу ҳақда «UzNews.uz» хабар бермоқда.

Аввалроқ Ўзбекистон бош вазири Абдулла Арипов 2 июнь куни Тошкент шаҳрининг Юнусобод туманига ташриф буюргани ҳақида хабар берилган эди. Мазкур ташриф давомида ҳукумат раҳбари тумандаги интернет-кафеларни ёпиш ҳақида кўрсатма берган.

Бош вазир Юнусободга ташрифи давомида туманда олиб борилаётган ишларнинг бориши билан танишган, янги объектларнинг қурилишини кўздан кечирган, шунингдек, болалар соғломлаштириш ташкилотлари шароитларини кўриб, ҳудуддаги бир неча ўқув муассасаларида бўлган.

«Хусусан, Абдулла Арипов 86-мактабнинг ташқи кўринишини қониқарсиз деб топди. Ҳукумат раҳбари ландшафтга нисбатан масъулиятсиз ёндашгани ва мактаб ҳовлисининг қониқарсиз аҳволи юзасидан мактаб раҳбариятини танқид қилган. Қониқарли жавоб олмаганидан сўнг, Абдулла Арипов мактаб директорини эгаллаб турган лавозимидан озод қилиш ҳақида топшириқ берган», — дейилади «UzNews.uz» хабарида.