Усмоновнинг адвокати Ижтимоий лойиҳаларни ривожлантириш фондига ҳовли-жой берилганини рад этмаяпти
Суд томонидан бизнесмен Алишер Усмоновнинг мухолифатчи Алексей Навальнийга нисбатан даъвоси кўриб чиқилаётган вақтда бизнесменнинг адвокатлари Подмосковьедаги ҳовли-жой Ижтимоий лойиҳаларни ривожлантириш фондига берилгани ҳақидаги фактни рад этмасликларини маълум қилди, деб ёзади «Газета.ru».
«Биз Подмосковьедаги ҳовли-жой ҳадя этилгани фактини рад қилмаймиз, аммо биринчидан, бу пора эмас, иккинчидан, ушбу фонднинг бош вазир Дмитрий Медведевга ҳеч қандай алоқаси йўқ», — деди Усмоновнинг адвокати Генрих Падва.
Падва, шунингдек, ҳовли-жой фондга беминнат хайрия қилинганини таъкидлади.
Алишер Усмонов Навальнийга қарши ор-номус ва обрў ҳимояси тўғрисида даъво берган. Даъвога Навальний бошли «Коррупцияга қарши кураш фонди» томонидан тайёрланган «У сизга Димон эмас» номли суриштируви сабаб бўлган; унда Алишер Усмонов Россия бош вазири Дмитрий Медведевнинг яқинларига мулк совға қилгани таъкидланади, Навальний бу совғаларни «пора» деб атаган.
