Сурхондарё ҳамда Андижон вилоятларидаги сайёр қабуллар давомида аҳолининг 1100 дан ортиқ мурожаати жойида кўриб чиқилди
23—29 май кунлари Ўзбекистон Республикаси Президентининг Давлат маслаҳатчиси Турсинхон Худайбергенов бошчилигидаги республика ишчи гуруҳи аъзолари Сурхондарё ва Андижон вилоятлари аҳолиси билан очиқ мулоқот тарзида сайёр қабул ўтказди. Бу ҳақда Мансур Абдусатторов «Дарё»га маълум қилди.
Сайёр қабулда вазирликлар, шаҳар ва туман ҳокимликлари, прокуратура, ички ишлар, суд органлари раҳбарлари ҳамда бошқа тегишли бошқарма ва ташкилотлардан 180 дан зиёд мутасадди иштирок этди.
Тадбирларда таъкидланганидек, бугунги кунга келиб Сурхондарё ҳамда Андижон вилоятларида истиқомат қилувчи аҳолидан жами 123 мингга яқин мурожаат келиб тушган. Хусусан, Сурхондарё вилоятидан – 55 минг, Андижон вилоятидан эса – 68 минг.
Мазкур вилоятлардан келган мурожаатларнинг асосий қисми уй-жой олиш ва уй-жой қуриш учун ер ажратиш (17,2%), моддий ёрдам, пенсия таъминоти ҳамда болалар нафақасини олиш (10,9%), меҳнат ва бандлик (7,8%), суд қарорларининг ижро этилиши (8,5%), банк-молия ва солиққа тортиш (5,1%), судларда жиноят ишлари, фуқаролик ишлари, хўжалик судларида ишлар кўрилиши (4,4%), фуқароликни қабул қилиш ва фуқароликдан чиқиш, паспорт олиш ва пропискага ўтиш (4,3%) каби соҳаларга оиддир. Шу билан бирга, тадбирда таъкидланганидек, мазкур вилоятлар ҳокимликлари мансабдор шахслари томонидан қонунчилик талабларига зид равишда фуқаролар ва юридик шахслар томонидан юборилган мурожаатларни ўз вақтида кўриб чиқмаслик ва муаллифга жавоб бермаслик натижасида бу соҳада жиддий камчиликлар мавжуд.
Жумладан, вилоят ҳокимликларида мурожаатлар билан ишлаш тизимини тўғри ташкил этмаслик, мурожаатларни тақсимлаш ва назорат қилиш ишларига малакали кадрларни жалб этмаслик ҳамда таҳлил ишларини йўлга қўйилмаслик оқибатида Сурхондарё вилоятида мурожаатларнинг 54,6 фоизга, Андижон вилоятида эса 22 фоизга кечиктирилган ҳолда жавоб берилган.
Сайёр қабуллар давомида Сурхондарё ҳамда Андижон вилоятлари аҳолисининг 1100 дан зиёд мурожаати жойида кўриб чиқилиб, 70 фоиздан зиёди ижобий ҳал этилди, қолган 30 фоизи эса асосли деб топилиб, ижро учун муддат белгиланиб, назоратга олинди.
Мисол тарзида 75 та ижро ҳужжати юзасидан 82,0 миллион сўмлик суд қарорлари ижро этилишини; 33 нафар фуқароларга автомобиллар етказиб бериш бўйича шартномалар тузилишини; соғлиқни сақлаш соҳасида 93 та мурожаатнинг ижобий ҳал этилиши, жумладан, 13 та ногиронлик аравачаси берилиши; газ таъминоти бўйича 41 та мурожаатнинг ижобий ҳал этилиши; банк соҳасида жами 36 та, жумладан кредит ажратиш бўйича 23 та мурожаатнинг ижобий кўриб чиқилиши таъминланганини таъкидлаш лозим.
Учрашувлар якунида кўриб чиқилган барча мурожаатлар бўйича вилоят ва туман даражасидаги мутасадди идора ва ташкилотларга тегишли кўрсатмалар берилди.
