Ўзбекистонда илмий мақола билан фан доктори бўлиш имконияти туғилди

Ўзбекистон Президентининг «Олий ўқув юртидан кейинги таълим тизимини янада такомиллаштириш тўғрисида»ги 16 февралдаги ПФ–4958-сон фармони ижросини таъминлаш мақсадида 22 майда қабул қилинган Вазирлар Маҳкамасининг «Олий ўқув юртидан кейинги таълим тизимини янада такомиллаштириш тўғрисида» 304-сонли қарори асосида ишлаб чиқилаётган ОАК низомлари лойиҳаларида жуда жиддий ўзгариш ва янгиликлар назарда тутилган. Бу ҳақда блогер Хушнудбек Худайбердиев Facebook ижтимоий тармоғида маълум қилди.

«Ҳозирда ОАК расмий сайтида ОАК низомлари лойиҳалари муҳокама қилинмоқда. Низомлар лойиҳаларида жуда жиддий, таъбир жоиз бўлса, инқилобий ўзгариш ва янгиликлар назарда тутилган», — дейилади хабарда.

Жумладан, Илмий даражалар бериш тартиби тўғрисидаги низомга киритилаётган ўзгартириш ва қўшимчаларга мувофиқ мамлакат тарихида илк бор самарали илмий фаолиятни рағбатлантириш ва халқаро тажрибани эътиборга олган ҳолда ОАК Раёсати қарори билан истисно тариқасида тадқиқотлар амалга оширилган муассаса хулосаси ва Илмий кенгаш тақдимномаси асосида қуйидагиларга диссертация ҳимоясисиз илмий даража берилиши мумкин:

• фан доктори (DSc) илмий даражаси — салмоқли илмий янгиликлар олган ва импакт-фактори тегишли даражада юқори ва рўйхат бўйича халқаро тизимга кирган илмий журналларда камида 12 та (ижтимоий-гуманитар фанлар бўйича 8 та) илмий мақола чоп эттирган мутахассисга эксперимент тариқасида (илмий натижани амалиётга жорий қилиш бўйича талаблар бажарилган ҳолда);
• фалсафа доктори (PhD) илмий даражаси — муҳим илмий янгиликлар олган ва импакт-фактори тегишли даражада юқори ва рўйхат бўйича халқаро тизимга кирган илмий журналларда камида 6 та (ижтимоий-гуманитар фанлар бўйича 4 та) илмий мақола чоп эттирган мутахассисга эксперимент тариқасида.