Ўзбекистон Президенти Шавкат Мирзиёев Тошкентда икки изли электрлаштирилган тезюрар ҳалқа темирйўлини қуриш лойиҳасини амалга ошириш чора-тадбирларини 19 май куни тасдиқлади. Ҳужжат матни Президент матбуот хизмати томонидан эълон қилинди, дея хабар бермоқда «Газета.uz».
2017—2021 йилларга мўлжалланган лойиҳа доирасида темирйўл босқичма-босқич қурилади, шу билан бирга, йўловчи ташувчи электропоездлар сотиб олинади. Лойиҳа қиймати 320,1 миллион АҚШ долларига тенг.Лойиҳага Хитой Эксимбанкининг 115 миллион долларгача бўлган миқдордаги қарз маблағлари жалб этилиши кўзда тутилган. Мазкур маблағларга, жумладан, йўловчи электропоездларини сотиб олиш режалаштирилган.
«Ўзбекистон темир йўллари» компанияси 2018 йил 1 октябрига қадар лойиҳанинг техник-иқтисодий асосини Вазирлар Маҳкамасига тасдиқлаш учун тақдим этиши зарур.
Президент қарорига асосан, Тошкент шаҳрида ҳалқа темирйўлини лойиҳалаштириш ва қуриш бўйича бош вазир биринчи ўринбосари Очилбой Раматов бошчилигида ишчи гуруҳ ташкил этилган.Ишчи гуруҳ олдига Тошкент шаҳар йўловчи ташиш транспортини ривожлантириш бўйича концепция лойиҳасини 2018 йил 1 январга қадар ҳукуматга тақдим этиш вазифаси қўйилган.
Изоҳ (0)