АҚШ Мудофаа вазирлиги Сурия шимолидаги Хасеке вилоятида 26 май куни юз берган йўл-транспорт ҳодисаси натижасида америкалик ҳарбий хизматчи ҳалок бўлганини тасдиқлади. Бу ҳақда «ТАСС» хабар бермоқда.
«АҚШнинг Жоржия штати, Логанвиль шаҳридан бўлган 22 ёшли мутахассис Этьен Мёрфи 26 май куни Суриянинг Хасеке вилоятида, автотранспорт воситасининг ағдарилиши оқибатида олинган жароҳатлардан вафот этди. Ҳодиса юзасидан текширув олиб борилмоқда», — дейилади Пентагон ахборотида.
Ҳалок бўлган ҳарбий хизматчи ИШИД террорчилик ташкилотига қарши операцияларда қатнашаётган эди. Аввалроқ унинг ўлими ҳақида операция штаби маълум қилган, бироқ ҳодиса жойи ҳақида аниқ ахборот бермаган эди.
Ҳозирги вақтда Сурияда АҚШ махсус бўлинмаларининг 500 нафар жангчиси, 250 нафар рейнжер ва яна 200 нафар денгиз пиёдалари ҳаракат қилмоқда. Пентагон Сурияга яна 1 минг нафар ҳарбий хизматчини юборишни режалаштирмоқда.
Изоҳ (0)