Ўзбекистон Марказий Осиё сув ресурсларидан фойдаланиш масаласи мазкур ресурсларнинг оқилона ва адолатли тақсимланишини кафолатловчи, минтақанинг барча давлатлари манфаатларини таъминловчи халқаро ҳуқуқнинг умумеътироф этилган нормаларига мувофиқ кўриб чиқилиши лозим деб ҳисоблайди. Бу ҳақда Ўзбекистон Ташқи ишлар вазирлиги маълум қилди.
Ҳозирда трансчегаравий дарёлар қуйи қисмида жойлашган Марказий Осиёнинг бошқа давлатлари каби Ўзбекистон ҳам сув ресурсларининг жиддий танқислигига дуч келаётганини ҳисобга олиб, ўзбек томонининг Марказий Осиё трансчегаравий сув ресурсларидан фойдаланиш бўйича нуқтаи назари қуйидагилардан иборат:
Марказий Осиё трансчегаравий дарёлари сув ресурсларидан фойдаланиш масалалари минтақанинг барча мамлакатларида истиқомат қилувчи 60 миллиондан ортиқ аҳоли манфаатларидан келиб чиқиб ҳал этилиши лозим;
Трансчегаравий дарёларда амалга оширилаётган ҳар қандай ҳаракатлар минтақанинг мавжуд экологик ва сув балансига салбий таъсир кўрсатмаслиги зарур;
Сувдан фойдаланиш ва экология соҳасидаги амалдаги халқаро-ҳуқуқий база Марказий Осиё трансчегаравий дарёлари ресурсларидан биргаликда фойдаланишнинг самарали тизими қурилиши пойдеворига айланиши талаб этилади;
Лойиҳалар бошқа давлатлар манфаатларига зарар етказилмайдиган ва икки зарур шарт: томонлар келишган сув баланси камайишига йўл қўймаслик ва минтақа экологик балансини бузмаслик кафолатланадиган конструктив ёндошиш ва муроса асосида амалга оширилиши керак.
Ўзбек томони Марказий Осиё давлатлари билан яхши қўшничилик ва дўстлик руҳида юқоридаги тамойиллар асосида ҳамкорлик қилишга тайёрлигини билдиради.
Изоҳ (0)