«Ислом бирдамлик ўйинлари»да Ўзбекистон делегацияси 100 дан ортиқ спортчи билан илк марта иштирок этади

12—22 май кунлари Озарбайжон пойтахти Боку тўртинчи бор ўтказилаётган «Ислом бирдамлик ўйинлари» мусобақасига мезбонлик қилади.

Бу қандай мусобақа?

Аҳолисининг катта қисмини ислом динига эътиқод қилувчи одамлар ташкил қиладиган мамлакатлар ҳар тўрт йилда бир марта Осиё ва Европа ўйинлари форматини ёдга соладиган алоҳида «Ислом бирдамлик ўйинлари»ни ўтказишга келишиб олди. У биринчи бор 2005 йил Саудия Арабистонида ўтказилганди.

Орадан тўрт йил ўтиб, иккинчи фестивалга Эрон мезбонлик қилиши керак эди. Бироқ Эрон ва араб мамлакатлари ўртасидаги вазиятнинг кескинлашуви оқибатида мусобақа бекор қилинди.

Ҳисоб бўйича учинчи фестиваль эса 2013 йил Индонезиянинг Пеканбару шаҳрида ташкил этилган. 2017 йилга келиб «Ислом бирдамлик ўйинлари»га Озарбайжон пойтахти Боку мезбонлик қилади.

Мусобақа 20 та спорт тури бўйича ўтказилади. Шунингдек, унинг дастурига пара-атлетика ҳамда пара-дзюдо турлари ҳам киритилган.

Боку—2017

Илк бор Европа қитъасида ўтаётган фестивалда 57 давлатдан ташриф буюрадиган уч мингдан зиёд спортчи иштирок этиши кутилмоқда.

Боку халқаро мусобақаларни юқори савияда ўтказиш тажрибасига эга. Зеро 2015 йил тарихдаги илк Европа ўйинлари ҳам айнан Каспий бўйида — Боку шаҳрида ташкил этилганди, деб маълумот берди МОҚ матбуот хизмати. Ана шу нуфузли мусобақада орттирилган тажриба озарбайжонликларга «Ислом бирдамлик ўйинлари» давомида ҳам қўл келиши мумкин.

Озарбайжон мусулмон давлатларининг ўзаро спартакиадаси дея эътироф этилаётган мусобақа учун бирорта янги объект қурмади. Европа ўйинлари учун махсус бунёд этилган бир неча спорт иншооти инфратузилмаси янада мустаҳкамланиб, янги турнир учун ҳозирлаб қўйилди.

«Ислом бирдамлик ўйинлари» жами 16 та спорт иншоотида бўлиб ўтади: Олимпия стадиони, Тофик Бахрамов номидаги стадион, Гейдар Алиев номидаги спорт аренаси, Гимнастика аренаси, Baku Crystal Hall спорт саройи, Сув спорти саройи, «Баил Арена», Боку теннис академияси, «Далга Арена», «Серхедчи» спорт саройи ва Сув полоси аренаси шулар жумласидандир.

Ўзбекистон

Ўзбекистон делегацияси «Ислом бирдамлик ўйинлари»да биринчи марта иштирок этади. Унда мамлакат шарафини 103 нафар спортчи 15 та спорт турида ҳимоя қилади: енгил атлетика, дзюдо, эркин ва юнон-рум кураши, карате, таэквондо, оғир атлетика, бокс, гандбол, ўқ отиш, спорт гимнастикаси, бадиий гимнастика, теннис, пара-атлетика ва пара-дзюдо.

Ўзбекистон делегацияси сафида Иван Ефремов, Рустам Жангабаев, Достон Ёқубов (оғир атлетика), Диёр Ўрозбоев, Гулноза Матниёзова (дзюдо), Нигора Турсунқулова, Дмитрий Шокин, Никита Рафалович (таэквондо), Оксана Чусовитина (спорт гимнастикаси), Анастасия Сердюкова (бадиий гимнастика), Надия Дусанова (енгил етлетика), Бекзод Абдураҳмонов, Магомед Ибрагимов, Ихтиёр Наврўзов (эркин кураш), Рустам Ассакалов (юнон-рум кураши), Вадим Скороваров (ўқ отиш), Сабина Шарипова (теннис), Садриддин Сайматов (карате), Александр Свечников (пара-атлетика), Дониер Салиев (пара-атлетика) ва Севинч Салаева (пара–дзюдо) каби Олимпиада ва Паралимпия ўйинлари иштирокчилари бор.

МОҚ эътирофига кўра, Ўзбекистон термаси «Ислом бирдамлик ўйинлари»да илк бор иштирок этаётган бўлса-да, фестивалнинг асосий фаворитларидан бири саналади. Боиси, ўзбекистонликлар Риода бўлиб ўтган XXXI ёзги Олимпиада ўйинларида 4 та олтин, 2 та кумуш, 7 та бронза — умумий 13 та медаль билан ислом давлатлари орасида биринчи ўринни эгаллаганди.

IV «Ислом бирдамлик ўйинлари»нинг тантанали очилиш маросими 12 май куни Бокудаги Олимпия стадионида бўлиб ўтади. Жамоавий спорт турлари эса 8 май санасида старт олганди.