1 май куни Остона аэропортида Афғонистоннинг Қозоғистондаги собиқ элчиси Муҳаммад Фаррух Баракий қўлга олинди, деб ёзади Kazakhstan Today.
У хизмат муддати тугаганидан сўнг Қобулга жўнаб кетмоқчи бўлган, аммо аэропортда кутилмаган вазиятга тушиб қолган. Божхоначиларнинг юклари ичида нималар борлиги ҳақидаги саволига у зардаси қайнаб, «бомба бор» дея жавоб қайтарган. Собиқ элчининг эҳтиётсизлик билан айтган гапи фавқулодда чоралар кўрилишига олиб келган.
Тезда аэопортга кириш эшиклари ёпилган, воқеа жойига 100 га яқин махсус топшириқли бўлинма жангчилари юборилган. Уч соат давомида дипломат ҳибсда сақланган, Қозоғистон ташқи ишлар вазирлиги ходимлари Баракийга кафил бўлгач, унга йўлида давом этиш учун рухсат беришган.
Ҳодисани ижтимоий тармоқларда изоҳлар экан, собиқ элчи англашилмовчилик учун жавобгарликни аэропорт ишчилари зиммасига юклади ва унга юк ҳақидаги саволни қайта-қайта бериб, унинг ҳазилига жуда жиддий муносабатда бўлишганини таъкидлади.
Изоҳ (0)