Арканзасда 1 ҳафта давомида тўртинчи маҳбус ўлим инъекцияси ёрдамида қатл этилди

АҚШнинг Арканзас штатида бир ҳафта давомида тўртинчи маҳбус қатл этилди, деб ёзади «Корреспондент.net». Бунгача штат расмийлари 10 йилдан ортиқ вақт давомида ҳеч кимни қатл этмай келаётганди.

38 ёшли судланувчи Кеннет Уильямс спорт жамоасини қўллаб-қувватловчи 19 ёшли қизни ўлдиргани учун қаттиққўл режим остидаги қамоқхонада жазо ўтаётганида турмадан қочиб, икки кишини ўлдирди. Маҳбуснинг адвокатлари ҳимоя остидаги мижози ақлан заиф эканини таъкидлашига қарамай, АҚШ Олий суди уларнинг апелляциясини рад этди ва уни қатл этилишига қарор чиқарди.

Гувоҳларнинг айтишича, ўлим инъекцияси ёрдамида амалга ошириладиган қатл жараёнида Уильямс йўталиб, бир муддат талваса тортган. Экпертлар ўлим инъекцияси қатл жараёнида маҳбусларга ҳақиқатдан ҳам жисмоний азоб бериш-бермаслиги борасида ҳамон тортишади. Одатда адвокатлар апелляция вақтида айнан мана шу далилга асосланади.

Арканзас штатида қисқа вақт ичида қатллар кўпайиб кетиши 30 апрель куни ўлим инъекциясининг яроқлилик муддати ўтиб кетиши билан боғлиқ. Ўлимга ҳукм қилинган яна тўрт киши қатл жараёнини маълум муддатга қолдириш борасида ютиб чиқди, аммо маҳаллий прокуратура ушбу қарорларга шикоят аризасини берди.Сўнгги йилларда АҚШнинг баъзи штатлари ўлим инъекцияси учун заҳарли моддалар дефицитига учрамоқда. Бунинг асосий сабаби сифатида қатл этилишга қарши чиқаётган Европа ишлаб чиқарувчиларининг АҚШга заҳарли моддаларни етказиб беришни тўхтатгани кўрсатилмоқда.

«Дарё»нинг Telegram’даги расмий канали — @toshqindaryo’га аъзо бўлинг!