Тошкент шаҳар ИИББда бўлиб ўтган брифингда маълум қилинишича, 2017 йил 20 апрель куни соат 23:00 да Миробод туманида тунги хизматга жалб қилинган ички ишлар ходими унинг қуролини олиб қўйишга уринишни бартараф этиш учун қуролдан ўқ узишга мажбур бўлган.
Пост-патруль ва ҳуқуқбузарликларни олдини олиш хизмати ходимлари Миробод тумани Фарғона йўли кўчасида жойлашган спиртли ичимликлар билан чакана савдо қилувчи дўкон олдида беш нафар шахс маст ҳолатда шовқин қилаётганини аниқлаган.
Уларни тарқатиш учун ҳаракат қилинган вақтда ушбу шахслар ички ишлар ходимларига нисбатан қаршилик кўрсатиб, сафдор Набиевга хизмат фаолиятида фойдаланиш учун бириктирилган ўқотар қуролни тортиб олишга уринган.
Тажовузнинг олдини олиш мақсадида ИИВ буйруқлари талабларига асосан қуролдан фойдаланиш маълум қилинганда мазкур фуқаролар ички ишлар ходимига тош отиб, қаршилик қилишда давом этган ва қуролни тортиб олишга ҳаракат қилган.
Шунда ички ишлар ходими қуролдан юқорига бир марта огоҳлантирувчи ўқ узган.
Ҳолат юзасидан Жиноят Кодексининг 219-моддаси биринчи қисми, яъни ҳокимият вакилига ёки фуқаролик бурчини бажараётган шахсга қаршилик кўрсатиш жинояти аломатлари билан прокуратура идоралари томонидан жиноий иш қўзғатилиб, тергов ҳаракатлари олиб борилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)