Ўзбекистон халқ шоири Муҳаммад Юсуф ҳаёт бўлганида 63 ёшни қаршилаган бўларди. Сана муносабати билан «Ellikqala.uz» сайти шоирнинг кенжа қизи Мадина Юсупова билан суҳбат уюштирди.
— Дадам Муҳаммад Юсуф вафотларидан кейин онажоним Назира Ас-Салом у кишидан қолган мерос унутилмаслиги ҳамда барҳаёт бўлишини таъминлаш мақсадида «Олтин қалам» номли газета ҳамда «Муҳаммад Юсуф» номидаги адабий-ижтимоий фондни ташкил қилдилар. Ҳозирда уларнинг фаолияти билан шуғулланиб келмоқдалар, — дея ҳикоя қилади Мадина Юсупова.
Тўнғич опам Маъсуда Ўзбекистон миллий телерадиокомпанияси «Ёшлар» телеканалининг «Давр» информацион дастурида ишлайди. Тўнғич опамдан кейин акам Шерзод бор эдилар, афсуски, 27 ёшида вафот этганлар.
Опам Нозимахон онамнинг ёнларида, газетада муҳаррир бўлиб ишлайдилар. Мен эса Инфин банкъда фаолият юритиб келмоқдаман.
Гувоҳи бўлганингиздек, барчамиз олий маълумотлимиз ва ўз соҳамиз бўйича фаолият олиб бормоқдамиз. Шоирликка даъвойим йўқ, аммо шеър ёзиб туришим тўғри. Бу йил дадамнинг таваллудларига 63 йил тўлиши муносабати билан илк «Соғинч сатрлари» китобим чоп этилди.
—Муҳаммад Юсуф оилада ота сифатида қандай фазилатларга эга бўлган?
— Отам учун оилада қизларнинг ўрни жуда баланд ва ўзгача эди. Бизни авайлаш ва эъзозлаш қаторида катта ҳаётга ҳар томонлама тайёрлаб борганлар. Бизни спортга берар, ёга билан шуғуллантирар, машина бошқаришни ўргатар, ҳаётда зарур ишларга ўргатиб борганлар.
Аксарият оилаларда қиз болалар оналарга яқинроқ бўлади. Бизда аксинча, дадам ҳам ота, ҳам энг яқин сирдош ва дўст бўла олган эдилар. Ўз навбатида, биз ҳам улардан ҳеч нарсани яширмас, доим маслаҳатларини олардик…
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)