Президент Шавкат Мирзиёев 26 апрель куни Ўзбекистонга расмий ташриф билан келган Туркия ташқи ишлар вазири Мавлуд Чавушўғлини қабул қилди. Бу ҳақда ЎзА хабар бермоқда.
Учрашувда Ўзбекистон—Туркия муносабатлари 2016 йилнинг 17—18 ноябрь кунлари Самарқанд шаҳрида ўтган олий даражадаги музокараларда эришилган келишувларга мувофиқ изчил ривожланаётгани мамнуният билан қайд этилди.
Ўзаро манфаатли савдо-иқтисодий ва инвестициявий ҳамкорликни ривожлантириш, Туркиянинг етакчи компаниялари иштирокида туризм инфратузилмасини модернизация қилиш, тўқимачилик, кўнчилик, кимё ва фармацевтика соҳалари, қурилиш материаллари саноати, қишлоқ хўжалиги маҳсулотларини чуқур қайта ишлаш ва бошқа йўналишларда, жумладан, «Ургут» эркин иқтисодий зонаси доирасида юқори технологияли замонавий ишлаб чиқариш қувватларини ташкил этиш бўйича лойиҳаларни амалга ошириш масалаларига алоҳида эътибор қаратилди.
Учрашувда минтақавий ва халқаро масалалар юзасидан ҳам фикр алмашилди. Мавлуд Чавушўғли Ўзбекистон Президенти Шавкат Мирзиёевга қабул учун самимий миннатдорлик изҳор этди.
«Чавушўғли давлатимиз раҳбарига Туркия компанияларининг Ўзбекистондаги лойиҳаларини қўллаб-қувватлаётгани учун Туркия раҳбарияти номидан ташаккур билдирди ва кенг кўламли ўзаро ҳамкорликни янада ривожлантиришга тайёр эканини таъкидлади», — дейилади ЎзА ахборотида.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)