2017 йил 20 апрель куни Алишер Навоий номидаги Миллий кутубхонада Ўзбекистон Республикасида хизмат кўрсатган журналист Ашурали Жўраэвнинг Ботир Зокиров хотирасига бағишланган «Юрак бўронлари» деб номланган китоби тақдимоти бўлиб ўтди. Бу ҳақда кутубхона расмий сайти хабар бермоқда.
Тадбирда адиблар, санъатшунослар, санъаткорлар, Зокировлар сулоласи вакиллари, талабалар ва кутубхона фойдаланувчилари иштирок этди.
Ўзбекистон халқ артисти Фарруҳ Зокиров ўзи учун ҳамиша ибрат бўлиб келган акаси Ботир Зокиров ҳақидаги хотираларини эслади ва китоб муаллифи А.Жўраевга ўз миннатдорлигини билдирар экан, шундай фикрларни изҳор этди: «Ботир акамнинг ҳаётлари қисқа бўлса-да, аммо ёрқин, жўшқин ва сермазмун ўтди. Биз уларнинг ижод аҳли билан бўлган суҳбатларини эътибор билан тинглар эдик. Мен уларнинг ўзбек миллий маданиятининг, миллатининг келажаги учун куйиниб гапирганларини кўп эслайман. Улар турли жанрлар: опера ариялари, ўзбек халқ ва турли миллатлар қўшиқларининг оригинал ижрочисига айланган эдилар. Бугун акам ҳақидаги ўчмас хотираларни «Юрак бўронлари» китобига жамлаб, бизга, қолаверса келажак авлодга ўқиб, қийинчиликларни енгиб яшашга ёрдам берадиган асар сифатида бизга армуғон этган А.Жўраевга оиламиз номидан миннатдорлик билдираман».
Изоҳ (0)