Lanmodo стартапи автомобиллар учун соябон яратди

Американинг Lanmodo стартапи кўп вазифали All-in-One Wireless Automatic Car Tent қурилмасини тақдим этди. Автомобиллар учун соябон вазифасини бажарадиган қурилмадан чодир ёки проектор учун экран сифатида ҳам фойдаланса бўлади. Бу ҳақда «Мотор» хабар берди

Қурилманинг асосий вазифаси машинани ёғингарчилик, оғир жисмларнинг тушиши ва қуёшдан сақлаш ҳисобланади. У автомобиль томига маҳкамлагич ёрдамида ўрнатилади. Шунингдек, маҳкамловчи тасмалар ҳам бўлиб, уларни машина эшиклари орасига қистириш ёки орқани кўрсатувчи кўзгуларга илдириб қўйиш мумкин.

Соябон масофадан бошқариш пульти ёрдамида ёйилади ва автомобиль кузовига тегмайди.

Соябондан автомобилдан алоҳида фойдаланиш учун уни ерга маҳкамловчи устун ҳам бор. Шу тариқа қурилмадан пляж соябони ёки табиат қўйнида ёғингарчилик вақтида чодир сифатида фойдаланиш мумкин.

Шу билан бирга, All-in-One Wireless Automatic Car Tent тўлиқ тўпламда харид қилинса, мижозга қурилмани чодирга айлантиришга имкон берувчи жиҳоз қўшиб берилади. Ерга маҳкамловчи устунда электр қуввати билан ишловчи қурилмаларни қувватлаш порти ўрнатилган. Соябоннинг орқа томонидан проектор учун экран сифатида фойдаланиш мумкин.

All-in-One Wireless Automatic Car Tent нархи 200 дан 400 долларгача етади.

«Дарё»нинг Telegram’даги расмий канали — @toshqindaryo’га аъзо бўлинг!