Фарғона вилояти Бувайда тумани Ички ишлар бўлими ҳамда бошқа ҳуқуқ-тартибот органлари билан ҳамкорликда ўтказилган тадбирлар давомида Бувайда тумани Оққўрғон қишлоғида яшовчи фуқаро Низомов махсус диний маълумоти бўлмай туриб ва диний ташкилот бошқаруви марказий органининг рухсатисиз диний таълимотдан (хусусий тартибда) сабоқ бериб келаётганлиги аниқланган. Бу ҳақда Ички ишлар вазирлигининг матбуот хизмати хабар берди.
Суриштирув давомида мазкур шахс томонидан қонунга хилоф равишда ташкил этилган «ҳужра»да Тошкент шаҳри, Тошкент, Жиззах, Андижон вилоятларида ҳамда Фарғона вилоятининг Олтиариқ, Боғдод, Бувайда, Учкўприк ва Фурқат туманларида яшовчи, турли ёшдаги жами 21 нафар ўсмир ва вояга етмаганлар диний таълим олаётганликлари аниқланди.
Мазкур ҳолат юзасидан ушбу шахс хонадонидан топилган 50 дона турли араб ёзувидаги диний китоб, 14 дона дафтар, 11 дона радиоприёмник, 6 дона лавҳ, 4 дона сим-карталар, 2 дона диск, 1 дона хотира қурилмаси (флешка), 1 дона чип келгусида тадқиқот ўтказиш учун далилий ашё тариқасида олинган.
Ҳозирда мазкур ҳолат юзасидан Бувайда тумани ИИБ томонидан терговолди суриштирув ҳаракатлари давом этмоқда. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)