«Пахтакор» Европа ва Бразилиядан янги мураббий олиб келишни режалаштирмоқда

Тошкентнинг «Пахтакор» клуби янги структурада фаолият олиб бориш ишларини бошлаб юборган. Бу ҳақда «Championat.asia» нашри хабар берди.

Айтилишича, энди жамоадаги қарорлар фақатгина бир киши томонидан чиқарилмайди, балки ҳар қандай масала директорлар кенгаши йиғилишида муҳокама этилади.

Клубнинг янги раҳбарияти «Шўртан» ва «Локомотив»га қарши ўйинларда максимал очко ишлаб олиш вазифасини қўйганига қарамай, Равшан Ҳайдаров мураббий этиб тайинланган «Пахтакор» Ғузордан 0:3 ҳисобидаги мағлубият билан қайтиб келди. Шу боисдан клуб ўзига Европа мамлакатлари ва Бразилиядан янги мураббий излаш ишларини бошлаб юборган.

Айни пайтдаги устувор вазифа биринчи давра якунига қадар иложи борича кўпроқ очко ишлаб олишдан иборат. Танаффус вақтида эса клуб сафи кучли легионер футболчилар билан тўлдирилиши ҳам мумкин. Асосий мақсад — 2018 йилги Осиё Чемпионлар лигасининг гуруҳ босқичида иштирок этиш.

Маълумот учун, «Пахтакор» клуби ўзгаришлар ҳақида расмий маълумот бериб улгурмади. Бу маълумот қачон ва ким томонидан берилиши мумкинлиги ҳозирча аниқ эмас.