Автомобиль ишқибозлари томонидан яратилган турли машиналар яратувчилар эҳтиёжининг ва фантазиясининг маҳсули ҳисобланади. «Мотор» нашри ишқибозлар ва механиклар томонидан мустақил равишда йиғилган автомобиллар жамланмасини тақдим этди.
Хитойлик Жионг Жиан томонидан яратилган амфибия ёмғирлар мавсумида юз берадиган тошқинларда ас қотади. Автомобильнинг двигатели орқа ўриндиқлар ўрнига жойлаштирилган ва бу двигателнинг сувга «бўкиб қолиш»дан асрайди. Машинага тўрт киши жойлашади ва у сувда 32 км/соат тезликда ҳаракатлана олади.
Марк Уитт томонидан яратилган яна бир амфибия 260 минг долларга сотилган. Автомобиль Sea Lion (Денгиз шери) деб аталади ва сувда 100 км/соат тезликда ҳаракатлана олади. Машинани Mazda RX-4’нинг эски двигатели ҳаракатга келтиради.
Суперкарни хитойлик Чен Йинкси олий ўқув юртидаги диплом иши сифатида икки йил олдин йиғган. Автомобильни йиғиш учун талаба беш минг долларга яқин маблағ сарфлаган. Маблағнинг камлиги сабабли у техник жиҳатдан мукаммал бўла олмаган. Энг юқори тезлиги 60 км/соат бўлиб, автомобиль умумий фойдаланишдаги йўлларда юриш учун сертификатланмаган.
Польшалик Яцек Мазур McLaren F1’нинг нусхасини яратишга муваффақ бўлган. Автомобиль 12 цилиндрли BMW двигатели билан жиҳозланган. Кузов панеллари эса ойнали пластикдан ясалган. Яцекнинг ишонтиришича, улов 300 км/соат тезликка эриша олади.
Америкалик Ким Имхофф ўзининг шахсий Lamborghini Countach’ини йиғиш учун 10 йил сарфлаган. Имхоффнинг Countach’и V8 Ford Windsor двигатели билан жиҳозланган ва 515 от кучига эга.
Австрияда яратилган 911 GT3 RS энг экологик ва тарихдаги энг секин юрадиган 911 ҳисобланади. Чунки Фердинанд 911 GT3 RS ҳайдовчининг қўл кучи билан ҳаракатга келтирилади. Конструкцияни тўрт оёқли велосипед деб аташ мумкин, унинг оғирлиги 99,6 килограммни ташкил қилади.
Иккита реактив двигатель билан жиҳозланган машина Ferrari Enzo кўринишида канадалик муҳандис Райан Маккуин томонидан яратилган. Уни йиғиш учун бир йил ва 100 минг канада доллари сарфланган. Rolls-Royce’нинг иккита реактив двигатели туфайли автомобиль 620 км/соат тезликда ҳаракатлана олади.
Ёғоч кузовли машина Opel Assona асосида яратилган. Автомобильнинг бир қисми замонавий услубда, бошқа қисми 1930 йиллардаги кабриолет услубида яратилган. Кузов эмандан ишланган ва ёнмайдиган суюқлик билан қопланган. Лойиҳа муаллифи техник-механик Василий Лазаренко ҳисобланади.
«Гран Туризмо Шербининих» 1969 йилда яратилган. Автомобиль «ГАЗ-21»га асосланган. 2,4 литр сиғимли 75 от кучига эга двигатель 150 км/соат тезликка эришишга имкон беради.
ISV купеси Челябинскда Сергей Ивансов томонидан яратилган. Лойиҳа устидаги иш 1982 йилда бошланган ва 2002 йилда тугалланган. ISV’нинг ўзига хос хусусияти панорамали том қисми ҳисобланади.
«ЮНА»ни яратиш ишлари 1970 йилда бошланган ва иш тамомлангандан сўнг ҳам доимий такомиллаштирилган. Автомобиль 2,8 литр сиғимли BMW’нинг М30 двигатели билан жиҳозланган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)